理想家居：
4人1屋3風格個個都係話事人

同一屋簷下，阿哥要型、阿妹要Cutie、阿爸要實用、阿媽要溫馨舒服，每人對屋企嘅風格同設計都唔同，真係順得哥情會失嫂意。若然地方許可，好似Eddy屋企咁，一屋4人住3層樓，情況就唔同晒啦！地下和諧Feel至啱一家人聚首，樂也融融；二樓睡房格仔大晒，重有自製LV床板贈興；三樓阿妹自成一國，我有我天地，加埋藍天白雲問你痕夠未！總之就人人可以各取所需，咁就得哥情又得嫂意啦！

記者：梁彩燕
攝影：陳陶鈞
設計公司：SpaceDesign（27132973）（www.spacedesignhk.com）
設計師：Jason

一屋三層只係四個人住，地方夠晒寬敞，設計師Jason又同屋主Eddy由細玩到大，老友鬼鬼，知道晒佢同屋企人嘅需要，不過「至緊要又至令人安慰嘅係設計師得到屋主嘅完全信任」咁話！而且單位面積夠大，可發揮的空間就相對較大，可以扑的牆身就扑，多房變少房，咁就可以增加每人每層的可使用空間啦！

地下：和諧至上

一家人聚首一堂嘅地方，當然要做得舒服啲。入門見偌大客廳，以木色為主，為咗避重就輕，米白地磚及綴以蓆紋紙，將幾種Texture混合一齊嘅設計，就可帶出日和風格兼且又令整個客廳Warm好多。天花則裝有闊身燈槽，除咗可以提供足夠及柔和的光線外，重不知不覺發揮咗分隔客飯廳的作用。而廚房都由原本傳統嘅密封式改為以木板配格仔趟門為設計，咁廚房就顯得更Pro更有大方之感。

二樓：格仔拉闊矮樓底

二樓好明顯係一個格仔天地，且用色較深，用木亦較多。原來用格仔都可以拉長空間，使得原本只有10呎多啲啲嘅樓底唔會變得更矮，所以媽咪房有格仔床板同格仔趟衣櫃，較多以沙比利木製造，顏色有少少近似酸枝，感覺比較沉實。屋主Eddy房就有全橡木格仔衣櫃同玻璃格仔牆，講開堵格仔玻璃牆，其實係用磨砂貼紙貼成LV格仔Pattern咁，無形中又可呼應番睡房嘅LV床板，衣帽間則放張DesignerChair，品味盡顯。
製作LVMonogram床板，說來呢段古其實都幾神乎奇技。話說Eddy女友極冧LV，Eddy愛女（朋友）心切，於是實行「自作業」，自家將LVMonogramScan完再放大，先貼底色再貼Pattern，用咗一日就炮製出傑作，誠意、耐性、手工可真令人佩服！女朋友實冧到暈！

三樓：藍白天地自成一國

上樓梯未轉彎就望到有塊碎玻璃，噢，Sorry，係冰花玻璃至啱！效果夠晒通透，唔似得成堵牆咁「得」住晒，轉埋彎正式上到3樓，成層好明顯係以藍白色做主調，只有妹妺凱怡一個人住，但卻做到有客廳有廚房，自成一國。望入大廳第一眼，哇！好靚喎！天花似足點點閃爍星火，好浪漫呢！熄晒燈或夜晚效果重正！成「屋」咁有Feel，原來都係凱怡嘅一句「想要藍天白雲」，設計師Jason就裝個會自動轉色嘅光纖燈槽，代替一般用油漆畫白雲，重風趣咁話：「太普通啦！個個都咁做重使搵我設計？」呵！又係喎！
除咗藍天、白雲，原來重有花草！凱怡特意搜購嘅意大利CeilingLight，成屋就夠晒大自然感覺啦！

醒目小常識：華麗冰花玻璃

冰花玻璃，主要以兩塊完整嘅玻璃夾着已敲碎的玻璃碎，效果通透華麗，最啱用來作間分隔區域之用，但切忌後面有牆，否則通透感會頓失，加射燈效果更佳。呢幅8×5呎約需萬多元。