噚日城市論壇討論大塞車，市區的士司機聯委會主席郭志標就話，佢哋同商台嘅溝通十分好，透過商台發放啲塞車消息，但政府嘅反應就好慢。話晒城市論壇都係港台嘅節目，你喺港台度大讚友台，梗係唔係幾好聽啦！唔知係咪咁，有港台中層就喺節目結束後，隨即同標哥了解一下，點解的士大佬淨係畀料商台，唔畀港台？
標哥好坦白咁講，冇辦法啦，大班鄭經翰喺商台做嘅時候，商台同佢哋已經合作搞「馬路之友」，每次司機報料都有五十蚊油券（油公司贊助），兼夾可以參加抽獎，獎品唔算好豐富，都係啲免費入油之類，不過都可以幫補吓職業司機。
鬼叫港台係阿公嘅，畀唔到線人費啲的士司機，如果八方係的士司機，有料都先畀商台啦！最後呢位港台中層就寫埋個電話畀標哥，請佢以後畀料港台！
爆料熱線：29290000、27860099
報料傳真：26239278
報料電郵：[email protected]