內地天后那英同高峰雖則連仔都生埋，但佢哋嘅戀情發展到𠵱家都好曲折懸疑。早排高峰同舊愛王納文發生嘅私生子事件，擾攘成年後，結果那英仍然原諒愛郎，殊不知佢兩公婆呢排又鬧意見，傳聞係因為那英難忍高峰花心，一怒之下帶埋囝囝高興返外家，決同高峰劃清界線。
噚日有內地報道指那英嘅閨中密友爆料，話高峰死性不改，做咗兩任老竇重成日花天酒地，夠膽揸住那英部「波子」載女遊車河，那英知道後梗係激到生蝦咁跳啦。本來那英喺上個禮拜日嘅母親節要上央視節目《歡樂中國行》，唱出溫情歌《愛的陽光》，但佢竟然臨時甩底，皆因嗰日佢喺屋企同高峰嗌大交後大打出手，搞到兩敗俱傷，那英激鬼氣，同高峰攤牌，重即時帶囝囝離家出走，返咗外家暫住。
內地傳媒日前影到那英喺外家嘅相片，見佢精神都唔錯，憑外表就好難判斷佢同高峰係咪再亮起紅燈。雖然那英未就分手傳言表態，但佢家姐那辛就同人講明，那英一家人暫時都唔會亮相任何家庭式溫馨節目。講真呀，那英同高峰成日又分又合，馮仁昭都戥佢攰，希望佢早日諗清楚自己嘅人生路應該點行啦。
吳佩慈噚日一身復古打扮同歌迷出席派對，早前佢俾台灣傳媒發現去睇精神科，原來佢憂鬱症復發，吳佩慈話𠵱家台灣四分一嘅人都有呢啲病，冇乜大不了。原來吳佩慈十九歲就有憂鬱症，嗰陣入行冇耐，成日有負面新聞出現，搞到情緒低落，試過兩個月冇出過街，後來喺屋企人鼓勵下開始睇精神科，佢亦呼籲大家要正面啲去睇呢種病。
鄭少秋喺紅館開嘅三場演唱會噚晚結束，李香琴、趙雅芝老公黃錦燊都係座上客。演唱會有一環節係「利是一叮」，秋官請咗三位現場觀眾上台唱歌，一秒有一封利是，卒之一位仁兄唱《做人愛自由》唱咗七十四秒，有七十四封利是。
詹瑞文剛完成《男人之虎》舞台劇後，又執導喺八月上演嘅經典兒童音樂劇《弊傢伙！巫婆靚靚唔見咗！》，呢套劇已經係五度重演。詹瑞文話小朋友應該培養對藝術嘅興趣，不過由於佢愛女只得十八個月大，要大啲至可以加入劇團。
王菲愛郎李亞鵬喺上海投資嘅酒吧VIPROOM喺前晚終於正式開張，老闆娘王菲就未見蹤影，亦唔見有群星到賀嘅場面，只得李亞鵬獨撐大局，所以現場見佢都幾無聊，重有啲目光呆滯，唔係掛住煲電話粥，就係飲酒，都幾心不在焉。
