一個月！已經成為港產片出碟嘅周期。復活節檔狂收千萬票房嘅《精武家庭》，今個星期新返3區DVD，一樣狂收熱賣成為本周最「熱」DVD；行內人估計好賣原因，故事劇情唔錯、青春無敵粒粒星，再加一眾碟迷實在餓咗好耐港產片，都係叫人打開荷包嘅原因！
記者：朱崇德 攝影：陳陶鈞
如果記性唔差，馮德倫以一個新晉導演，狂收千萬票房厲害之外，以短短一個月影期之內，全球有過百萬人次網上非法下載《精武家庭》一片，並成為《BT》Download榜首，亦是大家對此片焦點所在！發行方面可能亦意識到呢個情況，有可能影響到DVD嘅銷碟，所以在碟價平之餘，重大玩雙碟裝勁多Bonus同大送「精」品，務求做到大件夾抵食！
西片偷橋東拼西抄
話說黃秋生好似《大魚奇緣》中的吹水老竇，明明係一個跌打師傅，但成日周圍同人講自己後生時點威點威，又話做特工、又話一個打幾十個，但每每俾身邊朋友踢爆，令身邊一對仔女馮德倫同阿嬌好生尷尬，而且一家人的關係亦因此而日漸疏離而交惡；一日為復仇而來的王敏德，揭開了老父的真正身份，竟然是一個保護過氣特工的「特工頭目」，不過緊接而來的後果，就是被人活捉兼嚴刑拷問，一對仔女為救老父聯手起來，有如《非常小特務》，以一身中國功夫對抗特工集團！老實講句，如果睇慣西片，故事橋段真係覺得有啲東拼西抄，不過可幸是感覺尚算自然順暢，畫面亦睇得幾賞心悅目。
專家指導武打場面
《精》的另一大主題，就係連場的武打場面，當中有睇頭者！係請得《22世紀殺人網絡》的袁和平做動作顧問；武打加笑料，好傳統港式風格，推介是開首一幕，秋生對戰幾十個東瀛忍者，漫畫式動作設計場面，加最後顛覆式踢爆，真係幾搞鬼，馮德倫一向都打得兩手，今次對何超儀打到玩半空一字馬，都幾有功架！不過論真打得者，都係嗰班做配角嘅大反角，個個硬橋硬馬打到拆天，但同袁氏做武指嘅《功夫》一樣，咁樣反而令到一班主角演員好似打到軟手軟腳一樣，「以弱勝強」令電影信服度大大降低！
必睇Bonus假戲真打背後
主要Bonus大部份都喺Disc2，最好睇係攝影機背後，原來個個演員喺袁和平指導下，好多場都係真打！好似鬼仔棍王，棒打馮導演大鼻、何超儀一拳勁窩阿嬌心口，唔講都唔知原來背後假戲真打，值得一睇！此外，阿嬌、吳彥祖同馮德倫等都有個人專訪，好似為一眾偶像級Fans服務一樣！
店舖查詢：DVDPro
電話：23326326
地址：旺角奶路臣街6E德發商場地庫B4舖
