聯洲（048）收報2.025元，啱啱創1年兼快創出3年（02年5月24日2.1元）新高，阿仔聯洲珠寶（926）已經跑輸9條街，再跌飛身入市。
雖然，聯洲自己有鐘表及皮具業兩瓣業務，但05年度中期（12月止）純利8869萬元，聯珠由下而上4479萬元，達聯洲一半純利，貢獻唔細兼維持往績比重。聯洲現水位PE16.4倍，若果市場唔係突然認為鐘表及皮具業可享有較高PE溢價，好籠統以純利貢獻計數，聯珠起碼值8倍，但現價PE不過6倍多啲。再講，聯珠05年度中期，每股派息5.5仙，阿媽聯洲派息2.5仙，假定喺公布中期後（2月18日），同日買齊阿媽同阿仔，聯洲息率回報1.3厘，聯珠3.7厘，阿仔跑出。
聯洲現價較1年低位1.23元，高65%，兼有勢創3年新高，聯珠現價（1.38元）距1年低位1.12元不過20%，較近3年高位2.8元，離天萬丈。若聯洲重未話貴，咁聯珠就係超值。估計1.25元（1月13日公告中，講明係阿媽每股投資成本價）係長城價。
冠中地產（193）上個月公布，阿媽獲第三者傾買冠中股權，未到埋位階段，隻股已經變得好生猛。撇開呢筆唔好講，都有得諗。呢期冠中阿媽資本策略（497），仍揸住冠中8.59億股，持股量無變，但權益就由4月份18.04%減到得番最新17.63%，阿媽權益遭到攤薄，估計係冠中今年頭發行總值3640萬元CB，有承配人兌換新股有關，而CB每股兌換價講緊2.8仙，距冠中現價3.2仙，只有14%微利，已經係短線動機。但講明，高開高追就無謂，挨近CB成本價，就有得諗。
錢雋