容祖兒昨日到旺角出席職業安全活動，她透露原定於八月在佛山及深圳舉行演唱會，但因內地的主辦單位印了千多張無效門票，有關負責人最後更一走了之，演唱會因此告吹，令容祖兒十分氣憤，她不希望fans的金錢被人騙去。
昨日容祖兒、梁洛施、Boy'Z、李逸朗以及蔣雅文等一同到旺角新世紀廣場出席「2005榮譽職安健大使」委任典禮，容祖兒接受訪問時向記者大吐苦水，原因是她八月於佛山及深圳的演唱會可能會取消。
容祖兒說：「上次幫我喺廣州搞演唱會個內地主辦單位因為印咗好多廢票，之後就俾人調查啦，點知𠵱家呢件事冇得徹查，因為個主辦單位已經走咗佬，我覺得演唱會搞唔成唔緊要，但係唔好呃我fans啲錢呀。」
容祖兒透露現正有其他主辦商與她洽談繼續舉行演唱會事宜，她續說：「其實都有其他主辦商同公司傾緊繼續搞演唱會，我希望真係搞得成嘅話就唔好有同類事件發生，因為啲fans等睇我演唱會都等咗好耐。」
容祖兒透露或會參考早前張學友於內地舉行舞台劇《雪狼湖》時印製門票的方法，她說：「我聽人講過學友做《雪狼湖》時印一張號碼例如係123456嘅飛之餘，另外配合一張同號碼嘅細面額人民幣，咁觀眾入場時就要帶齊同號碼嘅門票同銀紙先可以入場。」另一方面，容祖兒對於日前一名孌童癖色魔被判終身監禁一事說：「呢啲人以前已經俾人捉咗去做太監啦。」
此外，Boy'Z成員Steven寄語姊姊張詠恩入行後不要太介意一些無聊的新聞，他說：「初時我知道家姐入行都唔係好贊成，因為佢份人唔係好捱得，我怕佢受唔住壓力。我同佢講過入行之後可能會有雜誌寫佢口大又多墨屎，我已經同佢講咗唔好為呢啲事唔開心。」
採訪：李珮洳 攝影：黃文成
