莫文蔚（Karen）昨日在中環出席鑽飾騷，大會送了一顆價值十萬元的鑽石給Karen，預祝下月初她三十五歲生日。Karen壓軸出場，她原本示範兩款鑽飾，但因用了一分鐘都除不下第一款頸鏈，結果只有換上戒指飾物。
莫文蔚昨日在中環出席「周大福閃耀出發鑽飾展」，大會為Karen帶來驚喜，送了一顆價值十萬元的鑽石給她，作為下月初她三十五歲生日的禮物。
穿上tubedress的Karen佩戴名為「興波作浪」、價值十四萬七千七百元的鑽石長鏈壓軸出現，原本大會安排她再示範另一套鑽飾，但因示範的頸鏈太長，難於除下，工作人員用了一分鐘亦未能除下鑽鏈，結果改戴戒指飾物。
用了一分鐘仍除不下鑽鏈，問Karen會否覺得尷尬？她說：「唔會，可能我潛意識都唔想除低條鏈，應該畀我戴返屋企。」問她有沒有收過男友送的鑽飾？她說：「呢啲梗係自己買先型㗎嘛，而且我已經認購咗媽咪啲珍藏，唔怕冇嫁妝。」
Karen透露忙預備下月的個唱，她說：「到時我會戴啲卡數更勁嘅鑽石，但我又多骨，負擔咁重條頸會好痛，有關方面已經幫我加啲海綿喺鑽鏈下面，等我冇咁辛苦。」她現在狂keepfit以求個唱時以最佳狀態示人，Karen說：「𠵱家日日練舞，得番一百磅左右，同埋戒甜、戒辣、戒凍飲，要養靚把聲。」
採訪：DebbieLum
攝影：ChenWaiOn
