現年四十歲嘅荷李活型男奇洛李維斯（KeanuReeves）早前盛傳搭上同佢合演《玩轉男人心》嘅五十九歲金像影后戴安姬頓（DianeKeaton），共譜子母戀。不過近日傳媒又指奇洛同戴安嘅戀聞純屬流料，原來奇洛最近搭上二十五歲索女星蓮妮歌蓮絲（LynnCollins）至真。
據英國傳媒報道，奇洛現正同老拍檔珊迪娜布洛（SandraBullock）翻拍韓國電影《觸不到的戀人》嘅荷李活版《IlMare》，而曾經同阿爾柏仙奴（AlPacino）合演《威尼斯之約》嘅蓮妮歌蓮絲亦有份演出。
據我羅拉喺片場嘅線人透露，奇洛同蓮妮喺拍攝期間互生情愫，重成日喺片場手拖手，有二五同我羅拉話：「奇洛成日都摸蓮妮嘅大髀，又喺休息期間互咀，佢哋兩個人一齊唔見咗人，好明顯係拍緊拖啦！」
唔講你唔知，原來奇洛自從上年九月踏入四十歲後，成日同人講自己有中年危機，又話好想快啲搵番自己個靈魂，想盡快成家立室喎。其實奇洛同蓮妮歌蓮絲男才女貌，都幾登對吖！