諾貝爾得主、華裔物理學家楊振寧去年底同年齡相差五十四年的碩士女生翁帆結婚，轟動整個華人社會。佢兩夫婦早前喺清華大學住所「歸根居」內接受女鋼琴演奏家孫穎嘅訪問，大談音樂，兩人訪問中途，不時握住手，非常合拍溫馨。
楊振寧話平日閒時會同太太一齊聽音樂，最欣賞貝多芬、德彪西、德沃夏克及多個蘇俄作曲家，至於近年揚名國際的內地鋼琴家郎朗，佢就認為對方技術雖好，但彈琴時嘅眼神、整體動作，凌駕咗原曲自身嘅表現內容，即係over咗，所以聽CD感覺好似更舒服。佢重話物理範疇重創新、推翻，問孫穎話鋼琴彈咗幾十年，仍然係嗰八十八個琴鍵，有無機會可以完全推翻呢個原則，完全創新咁話，重舉例話鋼琴可以變成長方形、四方形，甚至圓形！
至於楊太翁帆就喜歡聽國內民歌演唱家宋祖英嘅歌曲，佢話婚後生活好平淡自在，閒時喺花園種繡球花。佢又話自細羨慕彈鋼琴嘅女仔，𠵱家想學鋼琴，目標只係完整咁彈完一首樂曲。孫穎去年八月開始喺專欄〈音樂天空〉訪問音樂及文化名人，包括李嵐清、「雜交水稻之父」袁隆平、馬友友等，稍後重有中國太空人楊利偉登場。
爆料熱線：29290000、27860099
報料傳真：26239278
報料電郵：[email protected]