唔少人話購物係女人天性，運輸署署長霍文太太、申訴專員戴婉瑩接受新一期《選擇》月刊訪問，就坦言購物係減壓良方，而且佢精於講價，被親友同事譽為「格價專家」，最經典一役，係買入申訴專員公署現時位於上環招商局大廈嘅辦公室，當年立法會批出一億三千二百萬元畀公署自置物業，但戴婉瑩認為個市會跌，按兵不動兩年，後來分兩次出擊，以呎價二千幾蚊就買咗一層幾樓面辦公室，總共用咗九千一百七十萬元，較上限低四千萬元，𠵱家樓市回升，中區商廈升值，呎價已達八千三百蚊，公署帳面賺咗成個開有凸。
由於鍾意購物講價，喺港英年代戴婉瑩曾要求布政司霍德調佢做政府物料供應署（即現時政府物流服務署），但始終做唔到。佢於是轉為幫同事親友做「買手」，買頸巾、傳真機或辦公室用緊部咖啡機，都係經佢手買，佢購物堅持「呢個世界冇嘢係非買不可」嘅原則，而且訂出價錢上限，超過合理價錢就唔買，咁就無衰嘞。
爆料熱線：29290000、27860099
報料傳真：26239278
報料電郵：[email protected]