彭定康蛋撻店，別名泰昌餅店，因被業主加租一百一十巴仙至到八萬蚊一個月，宣布暫別公眾。消息一出，好唔得掂，門口日日排長龍，比平時條龍更長。秘書小姐中午經過蛋撻店，想話買件蛋撻返公司食，完全冇機會，佢見到除咗人龍之外，重有周梁淑怡議員受記者包圍，張宇人議員又有嘢講，邊度敢行埋去呀。
次日看報，記者話張宇人要為蛋撻店出頭，發散人在擺花街附近一帶代老闆歐陽天閏搵舖位，等佢可以「原區安置」，又話搵律師代老闆向業主談判加租事宜。嘩，有冇搞錯呀，做政治騷做到出晒位噃，如果個個業主瘋狂加租，都有立法會議員代佢出頭，「原區安置」，咁重成世界嘅？現在好多高級商場都以重組租戶、提升形象為名，乘機加租或者逼走老租戶。張議員、周梁議員、方剛議員（零售界功能組別）使唔使代租戶出頭呀？舉個例嚟講，大百貨公司馬莎、西田可唔可以搵議員出面幫手談判加租呢？沙田新城市廣場唔見咗百佳、惠康，又是否要議員幫手呢？各位租戶，不妨向自由黨請願，要求幫忙。
香港素來尊重合約，商界之事自有一套規則。業主在沙士時加唔到租，𠵱家加番夠本，到全香港商場都變成金舖、化妝品店、音響手機舖之時，必然悶死遊客，有好多間會執笠，業主又要減番租。
旅遊發展局最新數字顯示，三月份來港遊客之中，日本、美洲、歐洲、澳紐人士勁升兩成幾至三成幾，反而內地人（自由行遊客）就減少四點八巴仙，五月黃金周之自由行遊客又已經知道唔算多。數字隱藏黃色預警，拚命用貴租爭舖位嘅人士，以為可以做自由行遊客生意，慎防中招，一年後就交唔到租！