日本性感女星MEGUMI同小池榮子本來同屬YellowCab巨胸軍團，不過自從MEGUMI跟隨前社長野田義治過檔新公司後，佢同小池榮子已經再唔係同門姊妹，正所謂同行如敵國，最近MEGUMI重俾小池榮子批評胸大冇腦㖭。
據今期日本雜誌《周刊文春》報道，原來MEGUMI去年十一月喺YellowCab高層大地震時候，曾經對新社長講過，佢雖然都唔係咁認同前社長野田義治嘅經營方針，但為咗要報答野田當年捧紅自己嘅大恩大德，先至決定跟佢離開YellowCab。不過MEGUMI同雛形明子及山田麻利亞等師姐跟咗野田之後，𠵱家手頭上嘅工作都係喺舊公司時簽落，遲啲就冇乜嘢做。
相反，小池榮子繼續留喺YellowCab工作編排得密麻麻，所以佢覺得MEGUMI跟野田闖天下好蠢，佢重強烈批評MEGUMI話：「嗰條女（指MEGUMI）真係冇腦㗎，淨係得對胸。雖然佢係演出過『月九』劇集，但遲早同雛形明子及山田麻利亞一樣。報恩同你撈唔撈得掂係冇因果關係，要喺藝能界走紅，就要靠實力。」小池榮子咁講即係暗示MEGUMI有實力嘅話，根本跟邊個都冇問題，MEGUMI如果唔想衰畀人睇，就真係要畀心機發圍嘞！