澳門賭業股連續跌咗多日，終於有間歐資證券行出報告力撐嘉華建材（027），重講到嘉建值8至9元咁多，但噚日股價只不過反彈5.36％，收5.90元，成交股數3646萬股，金額2.11億元。
嘉建股價雖反彈，但相比之前8元的配股價仍然差好遠，睇嚟有排都見唔到家鄉，相反嘉華國際（173）股價雖然亦有回落，但相對嘉建就硬淨好多，「磚頭」始終係實淨啲。
至於益華國際（370）近兩日波幅驚人，周三勁插近5成後，周四急彈近4成，噚日最高曾升至0.248元，但收0.205元，升幅大縮至3.47％，成交股數1.99億股，金額4508萬元。
經紀陳早排提過益華股價下跌，係因為有個前主要股東沽貨之故。有陰謀論者話，可能有大戶係睇見有人沽貨，但又唔想高位接貨，所以任人質低股價，等待低位先至接貨。
至於外面傳話老闆被斬倉，根本唔係呢回事，公司亦已經發出聲明否認。
慕容小初