東亞副總裁兼中大校友彭玉榮用一句「Iwilluseallmypowernottoemployyou!」（我會用盡權力不聘請你！）咁有霸氣嘅說話警告反中大國際化嘅師弟，即時令一眾唔似得彭總咁有權有勢嘅中大校友大開眼界，重以為彭總喺東亞話晒事。不過，有人提醒八方，李國寶先至係東亞大老闆喎！
八方噚日就喺立法會見到寶哥哥，梗係問吓佢有冇同彭玉榮了解過呢件事。寶哥哥好似唔係好知乜嘢事。八方再問佢，咁中環係咪有張黑名單唔請中大搞學生會班校友，點知佢即刻義正嚴詞咁話：「冇啲咁嘅事！」佢重話：「彭玉榮唔係管personnel（人事部）！」原來彭總冇權力唔請邊類人，唔怪得佢道歉得咁快喇，原來老闆冇畀權佢！
唔怪得有個搞社會運動嘅中大校友同八方講，嗰班自命縱橫中環嘅精英校友，成日唔肯明刀明槍話有張黑名單，因為講乜都冇用，佢哋都係同大老闆打工。況且，只要有一個後生仔第日懷疑因為呢單嘢冇人請佢，一俾傳媒搞大，佢哋老闆聲譽受損，隨時飯碗不保，咁就只好鬼鬼祟祟出面放風嚇班學生仔！
傳真︰2623-9278
電郵︰[email protected]