恒指跌101點，窩輪市場雞毛鴨血。跌幅超過20%嘅窩輪有50隻以上，當然以C輪為主，升幅超過20%嘅窩輪只有13隻，當然以P輪為主。市場窩輪C輪多過P輪好多，揸C輪者多過揸P輪好多，結果炒家整體身家，蒸發唔少。
平保C輪2229：平保（2318）跌0.25元，收12.60元。平保C輪3837最熱門，有近14球易手，銀碼差不多4球，喺同類輪中跌幅最大，唔見28%，但都未能打入10大死火榜。隻輪7月下旬夠鐘，輪價23.9仙，溢價8.2%，槓桿率52.7倍（有效15.4倍），引伸波幅25%。冇錯，睇槓桿率，好爆，但要畀逾8%溢價，則唔化算。隻輪行使價13.40元，正股低過行使價0.80元。買呢隻輪，要預咗傷亡率好高，值博率唔高。
如果認為正股有機會上番幾毫，揀2229實際得多，8月初夠鐘，輪價23.5仙，溢價0.6%，槓桿率5.4倍（有效4.7倍），引伸波幅39%。
平保P輪3690：平保P輪3690收32仙，升42%，上龍虎榜，排第3，交投少，金額唔夠20萬。平保P輪數得出，只此1隻。隻輪下月尾到期，溢價5.3%，槓桿率39.4倍（有效15.3倍），引伸波幅25%。博正股喺個幾月內跌5.3%以上，不切實際，呢隻輪又係死亡率高而值博率低。
駿威C輪3529：駿威C輪3529收1.9仙，散47%，打入死火榜，排第3。7月初到期，溢價18%，咪理乜嘢槓桿率、引伸波幅。要正股升到3.10元以上，隻輪先至有剩餘價值，睇落隻輪「前途已卜」。
章盛