成班老友食午飯，未夠兩點，醫生Ｌ就話要走先，去上堂聽書喎，老Ｋ以為佢詐諦，問多幾句：「你都夠晒老資格咯，已經好少睇症，得閒就去打波，聽乜書呀？講性書呀？」醫生Ｌ話：「咪亂噏，我重係有牌醫生，每年都要上課好多個鐘頭，先至可以續牌。你再講嘢，下次唔同你打六○六。」眾人轟然大笑，只有左丁山唔知佢哋笑乜，問賓架Ｇ：「六○六係乜東東？」眾人又笑，呢次笑左丁山扮純情，老Ｋ話：「你都識得皮膚專家Ｆ嘅，下次同佢飲紅酒之時，問吓佢乜嘢叫做六○六啦。」
醫生Ｌ上完堂就會去新加坡度長周末，可能與議員Ｂ同機，講清楚啲，係去Bintan島打波。醫生Ｌ話：「新加坡冇乜好玩，無甚景觀，飲食遠遠不如香港，講價錢，貴過吉隆坡。𠵱家真係諗唔到有說服力嘅理由去新加坡。」退休賓架Ｙ附和此議，佢兩星期前去聖淘沙小住，發覺太過靜，唔夠人氣，佢話興建賭場係目前刺激新加坡旅遊、挽救SentosaResort嘅lastresort（最後方法）。
上海旅遊就唔需要任何方法去刺激，都旺到爆燈。酒莊Ｍ啱啱去完返嚟，講到上海人山人海，城開不夜，簡直熱爆。酒莊Ｍ去上海公幹之前，睇到一段新聞話香港人學習英語嘅熱情不如大陸、日本、泰國，當然差過新加坡好多啦。酒莊Ｍ話：「好彩我哋爛船重有三斤釘，只要下一代肯繼續學，英語程度仍然領先上海。我去花園酒店試酒，經過大宴會廳，裏面有人擺結婚喜酒，門口有個靚指示牌，上面寫住BrainandLiven，我以為眼花睇錯㖭，後來問清楚，先知道新郎叫做Brian，新娘叫做Liven，酒店職員分辨不清啫，其實ｎ與ｒ好容易寫錯，如果酒店寫成BrainandLiver，腦袋與肝臟結婚，就更加妙！」咁鬼心水清，酒莊Ｍ最好轉行做校對。