噚日凌晨一踏入黑色星期五，娛樂圈就鬧咗個大笑話，喺噚日凌晨十二點後，忽然有傳聞話有個巨星藏毒俾警察拉咗去旺角警署，傳遍整個娛樂圈同傳媒界，冇幾耐就有人話個巨星就係住喺加多利山嘅劉德華，幾乎每個聽到嘅人都好震驚。
馮仁昭於是第一時間去check吓，華仔當時喺屋企打緊邊爐，知道俾人咁傳法，只係大笑一輪，費事理咁多，食飽之後就大覺瞓。
而當華仔助手忙於接電話澄清冇件咁嘅事之時，個傳聞又變成話，當事人其實係黎明，隔一陣又話係許志安，搞到好混亂，大班記者於是撲去旺角警署等消息，後嚟黎明回應話冇件咁嘅事，安仔就身在內地，卒之等到半夜，警察同班記者都散隊，件事就不了了之，睇怕都係有人當黑色星期五係愚人節放流料。雖然早排發生好多年輕藝人藏毒事件，但今次竟然連形象健康嘅華仔同黎明都玩，真係過份得滯，俾人知道係邊個搞出嚟，一定犯眾憎，死梗。
陳煒同陳啟泰（阿Ken）噚日喺亞視總台以榮譽會長身份出席《亞視之友》成立活動，陳煒講笑話做咗榮譽會長之後，六十歲之前都唔會俾亞視炒喎，而阿Ken就話佢同陳煒已經係亞視嘅「雙層孖寶」亦都叫「傷殘孖寶」，因為有乜嘢活動，佢哋兩個都要拍住咁宣傳。
盧巧音（Candy）噚日去商台接受訪問，原來佢下月推出嘅唱片係佢同唱片公司合約期內最後一隻，𠵱家開始傾緊續約。聽講唱片公司已經打算加大佢唱片宣傳費，Candy話：「合作咁耐唔係講錢，係有少少七年之癢，但我哋好似一家人感情好好。」
梁詠琪（GiGi）新歌《偏見》嘅MV，因為男女主角殉情自殺嘅內容好敏感而俾電視台禁播，呢首歌係改編自真人真事，唱片公司同GiGi接到消息都好錯愕，不過為咗讓MV可以如期播出，唱片公司決定重新剪輯MV嘅內容。GiGi話：「呢首MV係想畀大家知道自殺係好錯嘅逃避方法，希望大家可以理性啲。」
李英愛五年前同導演朴贊郁、韓國男星宋康昊以及李秉憲合作嘅韓片《JSA安全地帶》，最近已經被美國一間電影公司買咗版權，準備重拍成荷李活電影。雖然未知套片搵乜嘢人演出，但故事背景將會由南、北韓改為美國同墨西哥。呢次係繼《原罪犯》後，朴贊郁另一作品將重拍西片，佢真係威水！
劉家輝嘅老父喺大前日（十一日）離世，享年九十三歲，對於爸爸嘅辭世，劉家輝雖然一早有咗心理準備，但係一向侍父至孝嘅佢都好傷心，而佢同家人亦安排咗呢個月二十八號喺香港殯儀館為亡父舉殯。
李克勤同譚詠麟嘅「左麟右李」演唱會原定本月二十一日喺天津舉行，但因為當地嘅主辦單位唔能夠依照合約規定，喺演出前支付全部酬金，所以藝能製作公司噚日證實佢哋會取消演出，阿倫同克勤對於臨時取消喺天津嘅演出都覺得好遺憾。
