九如坊一帶，最出名可能是蓮香，但要數街坊心目中的「風雲人物」，就要數金仔和PatPat。金仔和PatPat全身毛茸茸，眼神銳利，舉手投足，男女老幼通殺，帶挈所在髮型屋SalonK在九如坊出晒名。其實牠們的真正身份是SalonK的寵物天王，受盡萬千寵愛，情願「做隻貓、做隻狗，不願做人」。
記者：邵超 攝影：梁細權
鳴謝：SalonK（28702702）
SalonK在蓮香側斜路轉角處，抬頭望去，貓形Logo的木製招牌Raw味十足，店門偌大的玻璃櫥窗，有三隻甘吉拉貓正在休憩中，唔知重以為自己去咗寵物店。亦係因為透明度高，所以開店兩年，都咁受街坊歡迎，閒時幫襯剪髮，順便同小動物玩吓。
貓狗變髮廊PR
為咗紀念已故的K仔，Fred開髮型屋的主題由Logo設計以至場內布置，都有明確的貓主題。開業半年後，Fred決定把寵物帶返舖，主要係畀自己多啲時間照顧牠們，陪自己解悶，估唔到牠們全部出晒名。
「K仔係以前做Cafe的客人送的，見慣陌生人，性格好好。牠過身後，我再養英短金仔和家貓妹豬，屋企重有一隻ChowChow阿扁和雪橇。金仔最受歡迎，是店裏的PR。開舖後，我至知好多香港人養貓，吸引力重大過狗，重要係男人多過女人。有啲惡形惡相的男人，見到金仔就變到好溫柔，都幾得意。同街坊、客人講吓貓經、狗經，一日好快過。」
公關大戰
逼「隱閉貓」坐櫥窗
唔知點解，SalonK的所有寵物都是男性（PatPat除外），但部份名字都讓人產生錯覺以為是女性，就連客人拜託收養的三隻甘吉拉貓仔，都有兩個是女仔名，真係大整蠱。奇就奇在連主人Fred都無法解釋當初點解咁樣改名！
如果講大整蠱，三隻孤兒仔小吉、小雲和妹妹應該最慘，原因是：「甘吉拉貓的性格較孤僻，自己同自己玩，似足『隱閉青年』，但我留喺舖時間較多先至可以照顧牠們，所以擺牠們在櫥窗位，等牠們習慣吓面對人群，之後應該會好啲。」這個創新另類教育法，希望對牠們有幫助，話晒男仔唔可以咁怕醜。
狗狗興奮即瀨尿
SalonK的紅公關之中，除咗瞓覺多過做工的金仔，重有Fred的拉布拉多犬PatPat。返工半年的Jeff，最意想不到打髮型屋工，都可以帶埋寵物，好似返緊寵物店和寵物Cafe。「PatPat成日扮可憐冧客，做每件事前都會望吓我。牠好聰明，如果Feel到客人驚狗，就唔會黐住他，又識嗲人，附近舖頭的女仔都忍唔住過嚟摸吓牠，同牠玩。」
不過PatPat表面可人，其實都有個壞習慣，就是一興奮就瀨尿！好彩受教後（其實有點暴力）就改過自新。「牠同妹豬好Friend，妹豬是三色家貓性格，情緒易激動啲，一開籠就狂奔，係PatPat可以捉住牠，兩隻玩到好癲。」如果無咗呢班活潑奔放的貓貓狗狗，生活真係失色好多㗎！
購買寵物標準
英國短毛貓幼貓時，臉孔會較瘦削，頸肉和豐厚的披毛仍未成形。最理想應是紮實、身形勻稱和給你有力量的感覺，由四肢、頭頸、尾巴都顯圓潤，頭部呈橢圓形，兩耳之間的距離寬闊，臉頰豐滿，下巴結實，眼睛圓而大及較寬闊的鼻子。
按拉布拉多的參展標準，頭蓋骨寬闊，臉頰不應肥胖；耳朵應貼近頭部，偏向後方而位置較低；前肢須挺直而強壯，後肢強而有力，關節優美地彎曲，肩膊寬闊及傾斜，再看肌肉是否結實，眼神是否透露溫馴的本性。