迪士尼重有四個月就開張，鄰近嘅愉景灣與東涌新樓盤，順理成章借佢造勢，風氣蔓延至荃灣。中記噚日幫華置荃灣新盤樂悠居搞記招，除咗送美國迪士尼之旅，重請嚟迪士尼經典卡通人物米奇與米妮出席。
佢哋唔係平時見慣見熟嘅毛公仔，而係足有四呎高嘅氫氣公仔，比傳統毛公仔搶鏡得多。
華置柯靄邦喺記招上大賣關子，唔肯講樂悠居幾時賣，剩係話隨時賣得。點知，原來即晚就賣，重趁新地荃灣爵悅庭今日開售東爵軒前，噚晚搶先開賣。
佢解畫話，由於唔少買家想早啲買，所以開售四十一樓以上單位，呎價近五千蚊。市場人士話，噚晚賣出大概十件。
宣傳樓盤，通常都係不斷開記招，介紹賣點，再以優惠益買家，麗新元朗翠逸雅園，今個禮拜日嚟個別開生面嘅活動，舉行「翠逸雅園植苗助學日」，為苗圃行動籌款。
麗新發展助理副總裁潘銳民話，嘉賓每種一棵樹，公司會捐三千蚊，任何人當日捐錢植樹，每棵一百蚊，公司都捐相同金額。所有善款不扣除開支，全數捐畀苗圃。
出席嘉賓有中記施永青、美記張錦成、麗新劉樹仁、吳兆基與林煒琦、藝人蒙嘉慧、何超儀及田蕊妮等。
另外，今個禮拜日，長實天水圍嘉湖銀座商場，免費借出場地，畀「脊髓肌肉萎縮症慈善基金」，舉行慈善義賣，善款全數用作推行同改善病患醫療服務。
想買平嘢梗係要手快啦，中半山蔚皇居高層A，有個長線投資者即睇即買，連車位作價一千二百五十五萬，每呎一萬二千幾。
世紀二十一王康話，呢類千零呎嘅貨唔多，呢個叫價又平過低層，比起隔籬新盤菁英臺呎價逾萬三就更抵。
由睇樓到畀票，只係三粒鐘，夠晒快。單位市值月租四萬，回報三厘八。
聽講，買家喺同區有自住單位，今次買嚟投資。業主就打個和，諗住換件大啲嘅。
澳門樓市點，睇代理條數就知，澳門中記首季促成四百八十二宗成交，營業額九百三十萬，單計三月，佔四百六十七萬，四月重超過四百六十七萬㖭。難怪中記揚言，下半年會增開分行，最少三間。佢哋𠵱家共有七間澳門分行。
中記郭朝隆話，澳門四月錄得三千二百宗成交，與三月差唔多，其中千六宗係住宅。中記又話，港客及外地投資者佔三成，內地客有一成，最多仍然係當地人。
電郵地址：[email protected]
