立法會秘書長馮載祥噚日發晒信畀啲議員，勸佢哋淨係可以喺立法會停車場停泊一架車，唔准泊多過一架，因為停車場車位有限。祥哥託秘書處同八方講，立法會每次派泊車證畀啲議員，都講明淨係可以泊一架車，但最近又收到有議員投訴，所以有需要再出信提點囉。
根據立法會嘅紀錄，六十個議員之中，有五十五個登記咗會泊車，當中有三十二人登記咗超過一架車。但秘書處唔肯講係邊幾個有米議員有多過一架車。有議員同八方講，曾經見過有富貴黨嘅議員，同埋某富豪級嘅功能組別議員嘅家屬喺停車場泊車，咁梗係呢啲人搞到秘書長要出信啦！
傳真︰2623-9278
電郵︰[email protected]