尖沙嘴凱旋門呎價吓吓過萬，一樣其門如市，爭崩頭先至買到一間半間，好多有錢都買唔到嘅向隅客，惟有轉去二手市場搵貨，有單位喺手嘅真係唔憂賣。
有個業主見個市咁旺，而自己揸住嘅上、下層兩伙，市場上萬中無一，既然咁矜貴，索性自己畀錢落廣告招標放售，慳番筆佣金。佢上個月中先後買入五十一及五十二樓B室，咁難都俾佢買到，唔怪得登廣告大字標題話「可自製複式」。
代理話，凱旋門原裝只有五個複式，呎價至少三萬，可自製複式放盤嘅，暫時只有呢單。
註冊處登記，兩伙買入價共三千一百萬，𠵱家底價每呎萬五，即使以底價成交，都有近三成升幅，勁賺九百萬。
啲人對樓市信心強咗好多，愈嚟愈多採用長成交期賣樓。
中記麥成輝話，青衣珀麗灣十八座高層D，七百九十七呎，以二百九十九萬賣畀換樓客，每呎三千七百五。由於業主買咗嘅新單位，明年初至入伙，所以提供長成交期畀買家，咁啱買家又因未賣樓套現，故要長成交期，等資金可以靈活調配。
麥成輝話，珀麗灣呢類長成交期買賣，普遍四五個月，有啲其實根本係交吉嘅，但因業主想遲啲交樓，可以有多啲時間享用會所設施，至用長成交期賣。
蘭西記得，深井碧堤半島都有兩個一期業主，因為買咗二期樓花，願畀長成交期買家，等二期入伙搬過去住，唔使周圍搵樓暫住咁麻煩。
西九龍文娛藝術區，曾令入標財團「忽然藝術」，大搞藝術展覽，與贊助藝術表演等，雖然呢股旋風突然平靜下來，但有啲財團重繼續贊助文藝活動。
恒基地產宣布，捐出六萬英鎊，相當於八十八萬港紙，贊助倫敦維多利亞及亞伯特博物館，喺明年春季舉辦嘅「十七世紀中國陶瓷展覽」，以弘揚中國文化。
展覽會將展出首度由上海博物館運嚟，幾十件十七世紀國寶級陶瓷。
維多利亞及亞伯特博物館館長，已經答應做恒基西九發展建議嘅國際顧問團委員。
銀行界爭奪樓宇按揭貸款生意，為按揭轉介公司提供商機，今年首季，透過經絡集團申請按揭轉介個案，比舊年同期增加咗三成，計埋四月，就多三成半㖭。
最近，經絡集團獲得渣打銀行頒咗個「最佳表現」按揭轉介大獎。銀行與發展商合作，提供置業優惠就唔少，但搞呢類頒獎，聽講近年都係第一次，相信原因係經絡集團今年首季介紹咗唔少生意畀渣打。
咁究竟𠵱家行入渣打做樓宇按揭貸款，息率係點呢？據業內人士話係最優惠利率（五厘二五）減二厘五至二厘七，現金回贈係貸款額零點五巴仙。
荃灣摩天大廈如心廣場，除咗係荃灣新地標，重係華懋集團龔如心多年嚟心血結晶。
華懋呢件重頭作，建築期比政府規定嘅長咗好多，搞到要俾政府罰錢，但轉吓眼，低座酒店今年九月終於可以開幕，重將四十二層嘅低座，改名叫NinaTower，八十八層高嘅高座，則改名叫TeddyTower。
原來呢兩個名，分別就係龔如心同先夫王德輝嘅英文名，雖然王德輝失蹤多年，龔如心同家翁王廷歆單爭產官司案，又沒完沒了，但係單睇如心廣場呢兩幢樓嘅命名，唔多唔少可以見到龔如心對夫婿念念不忘之情。
電郵地址：[email protected]
