爵士復活節去深圳，以署理特首身份，拜謁港澳辦頂爺廖暉，點知當日因為佢OutofTown，因為只不過檻過條深圳河，如同去天水圍，並無委任下手「署理」，即時遭到政敵轟擊！
今次，爵士又試北上嘞，不過就去北京，於是就頒令由唐唐「署理」特首！
爵士競「選」，餘孽當權，老左條氣唔順，係人都知！有乜依郁，即時成棚人揸住碌竹，準備群毆！
煲呔份人有時做事都係唔夠細密，以為去深圳咁近，使乜搵人頂包？有乜嘢事暴動，一過皇崗就到，去北京，飛機都坐三粒鐘，梗係又當別論！
其實，唔好話以佢今時今日嘅身份，就算係一間細公司嘅部門主管，行開行埋，都應該有個交代。況且，佢亦應該明白自己有啲唔人唔鬼，唔上唔落！佢身為署理特首兼政務司司長應該統籌全港行政，要做尊敬舊老細嘅工夫，要額外抽時間研究吓點樣照顧老董退休之後嘅辦公室司機特權大優惠待遇，又兼籌備緊「選」凸首，所以，行上行落、行出行入應該要有少少危機感好啲。
美國總統第一任做到第四年，唔通淨係掛住競選連任拉票，乜都唔使做？梗係唔係啦！若果拉登趁呢個時候突襲點算？不過當奴現時要忙於競「選」嘅，係一個好騎呢嘅「選」舉制度，八百個「選委」，明係舉手機器，暗中有好多人想放香蕉皮，中央阿爺欽點，又欽點唔晒，所以當奴咪要顧住自己嗰瓣先囉！
加埋政務司司長一早就架空，下低一有事，好似冬冬咁，就慘嘞！孭到應一應！上天無路落地無門，想當奴出嚟撐？佢自己都要搵人撐喎，有乜法子唔俾人玩到殘呢？
冬冬慘遭「民意」蹂躪，無人護花，梗係啦！關事嘅都想匿埋，唔關事嘅又唔想惹禍上身，你話現時係咪無政府狀態呢？
傳真︰2623-9278
電郵︰[email protected]