現年四十四歲嘅日本靚太黑木瞳一向都被喻為模範媽咪，平時工作繁忙嘅佢趁上星期四黃金周假期，同老公陪六歲大嘅愛女去咗東京迪士尼樂園玩。因為黑木瞳係VIP，當日佢一家三口喺迪士尼唔單止有專人服侍，連玩機動遊戲都可以奉旨打尖。
噚日出版嘅《Friday》雜誌喺上星期偷影到黑木瞳一三家口暢遊迪士尼嘅相，聽講黑木瞳個女最近成功考入名校，做媽咪嘅梗係要獎勵吓佢。據報道，當日黑木瞳一家三口喺朝早九點已經到達迪士尼，阿女一去到已經急不及待要玩SpaceMountain、小熊維尼同巴斯光年做主題嘅熱門機動遊戲，非常開心。
雖然當時等玩機動遊戲嘅人打晒蛇餅，但黑木瞳貴為VIP，所以佢哋三個可以奉旨插隊打尖，據講平時呢啲遊戲通常玩一次要等成個鐘，但佢哋當日喺一個半鐘頭之內已經玩完三個遊戲，之後重去埋睇迪士尼音樂劇㖭。
另外，雜誌嘅記者重發現，當日黑木瞳個女有專人服侍，工作人員重買爆穀畀佢食，真係唔話得。而黑木瞳當日着住條短裙去玩，俾好多途人讚佢既青春又keep得好。
此外，日本傳媒噚日公布一個名為最理想已婚女性嘅選舉，結果黑木瞳再次奪得第一，而排第二嘅就係菜菜子。