香港影后張栢芝在《無極》中夥拍三位分別來自不同地區的影帝，包括韓國的張東健、日本的真田廣之和內地的劉燁，陣容十分強大。昨日一眾演員會見記者過後，會於香港時間今日凌晨時分在古堡開派對宣傳。 記者何永寧、何國豪康城直擊
康城影展於香港時間昨日凌晨揭幕，電影《無極》導演陳凱歌和太太陳紅、演員張栢芝、謝霆鋒、張東健、真田廣之及劉燁等在L'HotelduVillage召開記者會，吸引了近百名來自中、港、台、韓、日的記者到場。
《無極》陣容可謂非常鼎盛，除了來自香港的金像獎最佳女主角張栢芝，其餘還有金馬及金雞影帝劉燁、日本電影學院最佳男主角真田廣之及韓國影帝張東健。張栢芝飾演美麗的王后「傾城」，和片中每個男角都有一段情。栢芝覺得剛開拍與剛煞科時最難捱，她說：「剛開拍時，你擔心不知何時拍完，後來大家相處得很好，人人心中有愛，到了煞科時，我根本不想離開。」說完眼眶便紅了。
張東健接受記者訪問時則說：「初時接呢套戲好擔心，因為唔係用本土語言，但最終都可以應付，同其他演員除咗台詞之外，可以透過感情同身體語言溝通，我睇過陳凱歌嘅《霸王別姬》，係一套無懈可擊嘅電影，可以同佢合作我好開心。」
張東健又說：「香港演員我最欣賞梁朝偉，好希望可以睇《2046》，之前佢同張曼玉去韓國宣傳（電影《花樣年華》）時，我借咗架車畀佢哋用。我好渴望遲啲可以去香港宣傳《無極》，拍呢套戲期間我好掛住屋企同韓國嘅食物，但可以同日本、中國演員合作，拍嘅過程好享受。」
而栢芝日前接受台灣傳媒訪問時，表示和霆鋒將來如果要拍拖是「要來亦擋不住」，現時則是好友，陳凱歌亦說：「栢芝和霆鋒親密無間，合作時完全沒有芥蒂，我找他們合作時並沒有考慮他們有甚麼關係。」
對於被導演指與霆鋒「親密無間」，栢芝聞言大笑說：「我同所有演員都好夾，只係同霆鋒默契好啲，因為我哋嚟自同一地方，講同一種語言。報道將啲嘢放大二千倍，我冇乜所謂，做又麻煩，唔做佢哋又唔開心。」問栢芝可有和霆鋒打招呼，她說：「佢戴住黑超，見我哋唔到。」談到兩人一場感情戲，張栢芝感慨地說：「諗番過去我哋發生嘅事，特別容易入戲，大家睇咗就知道，我哋之間嘅『友誼』係幾咁深！」
而謝霆鋒則對親密無間的形容予以迴避，他說：「都唔知點講，同每一個人合作都咁好，好團結，我同真田廣之、張東健、劉燁約好咗，以後去到對方嘅國家，就由對方做東，我期待緊呢一日。」
謝霆鋒在片中飾演大反派「無歡」，他說：「當初接這部片，導演同我講，只要你一開始演，你就離唔開呢個角色。」半信半疑的他，後來真的完全難以自拔，他以國語對陳凱歌說：「你真的說中了。」
另外，《無》片會於香港時間今日凌晨在海邊著名的ChateauLanapoule古堡舉行大型宣傳，邀請各地片商出席，一眾演員都會現身。
