鄭中基與楊愛瑾（Miki）合拍的《龍咁威2》將於下月底上映，二人跟隨黎應就師傅學詠春，鄭中基拍戲時要以真木做的木樁練習，弄致雙手瘀青亦沒有作聲，豁出去忍痛拍完為止，令Miki甚為欣賞。
鄭中基（Ronald）與Cookies成員楊愛瑾合作的新戲《龍咁威2》早前拍竣，於下月底上映。Ronald首次與Miki合作，二人飾演詠春高手，拍戲前先跟詠春大師黎應就師傅學功夫，導演谷德昭往探班時，想到戲中有一詠春師傅角色，同時是Miki的父親，便邀請黎師傅客串，雙方一拍即合，結果黎師傅戲裏戲外都成為Ronald及Miki的師傅。
戲中講述Ronald得悉心儀的Miki是詠春大師女兒後，為了追求對方，便投其所好跟黎師傅學功夫，希望親近Miki，未想到卻經常遭嚴格的黎師傅管束，學功夫多過談情。Miki說：「我哋練詠春時要對住個木樁練打，個木樁係軟啲嘅，但嗰日拍戲嘅係真木，見Ronald埋位時要狂打好多下，我後來試打咗一吓，痛到爆炸，隻手即刻瘀咗，拍完同Ronald傾開，原來佢成隻手瘀晒都冇出聲，忍住拍晒，真係好佩服佢咁專業。」
Ronald繼之前扮演瑜伽大師後，今次又學詠春，他因而對打功夫愈來愈感興趣，所以吃少少苦也在所不計，Ronald說：「我當時發現用真木，都知大鑊，不過劇情話我啱啱學打，起初一定係會好痛、好辛苦，用真木打又真係極痛，啱晒劇情要求囉，痛都冇法，為咗拍好戲，我豁咗出去㗎啦。」
Ronald又大讚首次拍戲的黎師傅，他說：「佢飾演詠春師傅簡直係入晒戲，冇得彈，因為佢本身就係一個詠春師傅，分別只係現實生活佢唔會敲我個頭，戲裏面就要。」
