香港寬頻宣布大優惠，訂用寬頻與寬頻電視，月費只需一百四十八元，網上行立即推出套餐，話明NOW電視自選收費頻道超過一百三十八元，六折收費。
左丁山身處中環，幾年前想訂有線電視，一問之下，公司每月訂費要幾千蚊，嚇到唔敢講嘢。最近心思思，因公司用開網上行寬頻，順勢訂埋NOW，網上行之sales非常合作，好快就安排師傅嚟安裝NOW，訂咗幾個台，月費一百四十元，可以話方便快捷妥當。
呢日大記者來電，叫睇BBC直播莫斯科閱兵，全球領袖雲集，不容錯過。唉吔，自選頻道有FOX，冇BBC，睇唔到㖭，FOXTV每月收費三十五元，BBC收七十元，貴成倍，諗咗一陣，決定放棄霍士，改訂BBC，點知不能按掣訂用，必須打電話，打電話就煩咯，秘書要聽對方電話播出音樂十幾分鐘，先至有人接聽。NOW啲推銷邏輯真奇怪，新訂戶唔可以改菜單（即自選頻道之組合），只可以加新菜式，換句話講，霍士TV唔可以飛走，只可以增加一個新頻道（其實任加唔嬲），有冇搞錯呀，月費一百四十元減去霍士TV（三十五元）再加BBC（七十元），月費實質上加到一百七十五元，增幅百分之二十五，令NOW之ARPM大幅度增加，咁都唔制？係要我畀多七十元，去到加幅百分之五十先至得？
本來想畀多三十五元，一怒之下，決定連BBC都唔訂，維持舊制不變。蘇澤光仁兄成日話要想辦法增加NOW嘅ARPM，但啲sales就趕客，點搞呀？好多時訂台係出於一時之快，拎住遙控一㩒掣就即訂，唔會諗錢，但NOW未做到呢步，要人打電話等餐懵，已冷了半截，再與sales爭論，重訂乜鬼新頻道吖！