阿仙奴球迷𠵱家究竟想要啲乜？應該係畀份一年合約佢哋嗰個荷蘭老牌前鋒伯金。
阿仙奴喺前晚場英超聯主場謝幕戰，送咗七隻光蛋畀愛華頓，當中伯金更踢到曉飛咁滯；當佢每次攞波，在場球迷唔單止幫佢打氣，重猛咁叫「多一年合約」。季尾就約滿嘅伯金，係就係老啲（啱啱過咗三十六歲），但傳送同射門功夫重係咁世界級；而我求大俠都知年紀係佢同阿仙奴續約嘅最大障礙，但所謂「家有一老如有一寶」，好似AC米蘭有馬甸尼、拜仁亦有史高爾；況且，雲格早前話喺未來日子會畀多啲機會新人，如果有伯金呢啲沙場老馬喺旁邊睇住，效果應該會更好。
話時話，阿仙奴都算有人情味，明知巴西中場伊度季尾走，重畀佢落場；而隊友重讓個十二碼畀佢，等佢可以攞到今屆主場首個入球。希望阿仙奴可以延續呢份人情味，等自九五年夏天效力至今嘅伯金，喺下季可繼續同英超聯球迷見面。
曼聯雖有機會攞英足總盃，但因連續第二年失落英超聯兼畀冠軍車路士放甩二十分（截至周五），於是佢哋領隊費格遜罰班球員，縮短佢哋嘅暑假；班球員原來放到七月十日，但𠵱家要喺六月二十七日歸隊，放少兩星期。如果佢哋下屆重攞唔番個英超聯，班球員分分鐘連暑假都冇假放。
基爾禾前日炒教練，臨時拉夫搵前隊長迪安祖路教埋最後三場，都幾令人擔憂。話說基爾禾本來想搵前帥迪尼利救亡，可惜佢失意於羅馬，「一朝被蛇咬」後唔肯制。講真，羅馬由干地領軍後未嘗一勝，前日意盃又臨尾香和波，戰績重衰過迪尼利領軍時。迪尼利唔復出真可惜。
哥連泰斯日前怒炒阿根廷教練巴薩里拉，梗係要再搵過個新教練啦；以佢哋財力，應該冇乜難度，但最新對象李奧就拒絕咗該會嘅聘約。呢位前巴西國家隊教練，目前喺日職聯教緊下游球隊神戶勝利船，你慌唔係怕咗巴西球會常炒教練嘅風氣咩，畀着我都寧願繼續賺日圓囉！
華倫西亞今季戰績大倒退，最近傳出季後將會大清貨賣走球員，球會主席蘇拿重話後悔季初同幾個球員續咗長約，𠵱家想放棄都未必有人要，並考慮將來只會同球員簽短約。計我求大俠話齋，如果真係只會畀短期合約麾下球員，對前景毫無保障，到時搵鬼肯加盟你哋球會咩。
逢周一至周五見報