鄭希怡（Yumiko）同關志斌（Kenny）係無綫合約歌星，噚日佢哋同許懷欣、黎明小師妹衞蘭出席同有線電視有關連嘅「廣東電視台珠江頻道進入香港、澳門有線電視網」記招。
Yumiko好大膽咁話事前冇知會無綫，亦唔驚會出事，因為接受訪問時佢會用普通話。而Kenny亦異口同聲話用普通話就同無綫冇牴觸咁話。不過馮仁昭記得上年關心妍因為主動畀有線娛樂新聞台播出佢喺日本學藝時嘅廣東話片段，令無綫勃然大怒，最後重決定封殺關心妍㖭。唔通Yumiko同Kenny咁大膽，唔怕無綫封殺？
Yumiko覺得應該支持其他文化，大家交流吓，多一個頻道對藝人都有幫助，Yumiko重話：「好開心多咗個新頻道畀香港觀眾睇到，遲啲珠江台播《外來媳婦本地郎》，我都好有興趣睇，我最鍾意煲劇，試過連續三日追睇《孖仔孖心肝》。」
另外，衞蘭話唔知老細黎明同徐子珊單新戀情，不過佢都有興趣問吓黎明單新聞係咪真，問佢信唔信黎明同徐子珊拍拖？衞蘭就話：「唔知，佢平時好忙，成日飛嚟飛去，呢個就係我嘅個人意見。」咁咪答完等於冇答！
王蓉早前到上海為即將推出嘅新碟舉行記者會，順便同當地歌迷聚會，王蓉一邊唱新歌《哎呀》，一邊同歌迷喺台上跳舞，雖然舞步好似好簡單，但動作要做得同偶像一模一樣就一啲都唔容易。王蓉話面對繁重嘅工作壓力，都會玩吓保齡球減壓，𠵱家技術重有番咁上下㖭。
伍詠薇噚日去尖沙嘴出席遊戲機宣傳活動時，獲贈一部最新款嘅遊戲機。伍姑娘笑笑口話唔會將遊戲機轉送丈夫練海棠，佢話：「佢唔好玩遊戲機啦，佢玩我已經夠，同埋佢要搵錢，唔得閒打機㗎啦。」
伍姑娘又話玩呢部最新推出嘅遊戲機時，一定會吸引好多後生仔圍觀，到時自己一定「大飽眼福」。
有線新知台籌拍新節目《至愛品牌》，訪問十個「至愛品牌」嘅創辦人，呢個節目除咗喺香港播映之外，重會喺內地十六個城巿播出。有線節目部執行董事徐小明（左）以及兩位主播陳貝兒同吳天瑜日前一齊喺廣州出席記者會，原來兩位靚女都鍾意名牌，所以特別有興趣做呢個節目。
有份拍攝徐克新戲《七劍》嘅陸毅，早幾日同馮仁昭報喜，佢話出年就係佢同內地演員女友鮑蓉拍拖十周年嘅日子，所以佢決定喺出年拉埋天窗。
陸毅話一個好演員要有好嘅生活，所以唔擔心結婚後會影響事業，不過佢老婆喺結婚之後會減少工作。
