視著名導演安東尼奧尼為偶像的王家衞昨日接受訪問，他自言十分欣賞這位影壇大師，所以答應與對方一起拍攝《愛神》。王家衞認為《愛》片中鞏俐為張震手淫的場面最震撼，外國影評人亦評價《愛》片與《巴黎最後探戈》一樣震撼。
由著名導演王家衞、安東尼奧尼（MichelangeloAntonioni）與史提芬蘇德堡（StevenSoderbergh）聯合拍攝的新片《愛神》已於昨日上映，記者昨日在UA太古城戲院遇見王家衞，問到為何與其他導演聯合執導《愛》片，王家衞解釋說：「安東尼奧尼搵我拍呢部戲嘅，佢已經九十幾歲，冇體力去拍完一部戲，所以佢就搵我同其他導演一齊執導，安東尼奧尼係一位大師級導演，我非常尊敬佢，所以我幫佢一齊拍呢部戲，完全係冇計較酬勞，拍呢套戲係為咗向佢致敬。」
《愛》片由王家衞的《手》、安東尼奧尼的《慾》和史提芬蘇德堡的《夢》三個故事組成，《手》片是講述一個男孩到男人始終不變的初戀故事，王家衞選擇張震飾演這個角色，是因為對他十分熟悉，就像是小弟弟一樣。而張震要與充滿演戲天份的鞏俐合作，對他來說肯定是個大挑戰，片中最震撼的場面，正是鞏俐為脫光褲子的張震手淫。
王家衞接受本報訪問時說：「有啲外國影評人睇完呢部戲後，形容呢部戲同《巴黎最後探戈》一樣咁震撼，雖然兩部戲相隔咗三十年，但部戲內容同拍攝手法好相近。而我負責拍嘅《手》，因為主題都係講情慾，所以我喺開戲前，已經同鞏俐講得好清楚，佢好專業，當佢知道係劇情有需要，佢就冇任何問題，拍攝嗰場大膽戲前，我都幾擔心，但正式拍攝嗰日，只有我、攝影師同兩位演員喺現場，清場後鞏俐同張震演得好自然同投入，佢兩個完全冇尷尬，完全融咗入個角色度，消除咗我之前嘅疑慮。」
談到與妮歌潔曼（NicoleKidman）合作新片《來自上海的女人》，王家衞說：「部戲會到年尾先至開拍，不過我同佢之前已經見過幾次面，佢係一位好大方、友善嘅女演員。」據悉妮歌十分期待與王家衞合作，兩人曾多次見面洽談劇本細節，而張叔平早前亦已飛往美國為妮歌試造型。
採訪：蔡丹 攝影：彭琮然