嘟卡黨為$2喪擺龍

橋上有好景！中環至半山行人自動電梯，可被列入「香港遊」新景點，因為這裏有個在午飯時間吸引逾300人排隊的地鐵特惠站，大家不遠千里而來就係為咗嘟完搭地鐵慳$2。它，完全可以代表全港16個地鐵特惠站講一句「好攰！」，亦代表香港人唔蝕底的不死精神！

記者：邵超
攝影：副刊攝影組
模特兒：阿怡@煉星堂

地鐵特惠站已經推出一段日子，原意是鼓勵距離地鐵站較遠的人士搭地鐵，大部份人對它引發的排隊熱都略有所聞，但原來重有好多香港人唔知點搵到它們（部份位置唔就腳！）。只要搵到它，用成人八達通卡嘟一嘟，到該站指定的地鐵站入閘，就可以即時慳$2。每逢返工、午飯和放工時間，特惠站都慘被圍攻，嘟個不停。

16個地鐵特惠站分布查詢：
http://www.mtr.com.hk/chi/whatsnew/faresaver/faresaver_c.htm）

■香港離島一日通印刷都算精美，最重要有埋優惠券和旅遊指南。

鬼佬問搞乜～
■外國人眼定定望住地鐵特惠站似望怪獸，搞唔清係乜東東。

日本人一嚿雲～
■日本遊客持airportexpresspass無得扣分，他們說嘟吓都幾有趣。

每日1:00pm中環龍
■中環至半山行人自動電梯日日午飯時間，人龍排到落威靈頓街。

經過多日觀察，地鐵特惠站效應點止人龍一條，重有唔少超自然現象已經發生！好似拎住幾十張八達通卡的膠袋黨就個個身懷絕技，亦有人慣晒手勢搏懵打尖，盡現人生百態！
最估唔到的係中環寫字樓的辦公室助理阿姐，呢排個個都加多咗一件「份內事」，就係放工前集齊公司同事的八達通，幫佢哋嘟卡平2蚊！喂，請問各位你哋有冇要求OT補水先？

持卡量：30張
■阿姐甲：「我喺中環中心過嚟，未必日日係我嘟，邊個同事得閒就邊個嘟。」

持卡量：20張
■阿姐乙：「幫公司入開票咪順便過嚟嘟埋囉！中環中心寫字樓過嚟好吊腳吖嘛！」

持卡量：20張
■阿姐丙：「同幾個膠袋黨日日見慣見熟囉！最勁有個阿姐拎住80張嚟嘟！」

多到爆
■阿姐戊：「我啲卡要分門別類靠晒一條橡筋，否則好易混淆唔同部門。」

認卡高手
■阿叔甲：「我日日嚟嘟，都記得晒啲卡的主人係邊個。」

幫同事
■後生仔：「我做開舖頭，同事啲卡做晒記認，好易分！」

摩打手
■阿姐丁：「我喺電車路嗰邊行上嚟，公司啲人嫌遠咪搵我過嚟囉！」

詐詐諦打尖慣犯
■恤衫阿叔見到人龍，手上攞住八達通，等龍頭黑衣女郎一擰轉背，阿叔手法利落扮不經意行過即嘟，眼尾都唔使望，明顯係打尖慣犯！

中環麗人Maggie
「好少搭地鐵，唔會專登過嚟嘟，撞啱會搭地鐵經過時就會嘟。」

尖東SalesZoey
「我用轉乘優惠，返工巴士轉地鐵或小巴轉火車，放工火車轉巴士，唔使慳$2。」

將軍澳居民胡小姐
「無理由特登兜圈行20分鐘嘟機，應該喺將軍澳廣場加多一部機。」

尖東OL蘇小姐
「平時都搭地鐵，食Lunch咪行過去半島中心嘟卡，近啲吖嘛！」

「即日來回證」：它唔係一張證，當你預計當日會搭新巴將軍澳同一路線來回（如792M、796A、796B、796C、796S及796X）時，首程拍卡前按綠色鈕，就會一次過扣除兩程車資，最高可享達八五折的優惠。由於最多只係慳$2，呢個優惠對於中途上車人士就唔適用。（優惠期至8月31日）
「八達通長途車資優惠」：新巴和城巴各線車資$15以上的路線九折或即日來回九折優惠。

查詢：21368888

■用同一張八達通卡，即日來回就可以慳錢。

■拍卡之前記住按綠色掣，唔係就無優惠啦。

「香港離島一日通」：本來專為遊客而設，但如果你在星期一至六有時間，不妨花$30買一張Pass，就可以一天內乘搭普通渡輪（普通位）及橫水渡，任你穿梭大嶼山、長洲和坪洲，Pass附超過$60的優惠券和旅遊指南。如果齋玩一島，Pass就唔抵喇！

查詢：21318181

■香港離島一日通印刷都算精美，最重要有埋優惠券和旅遊指南。