香港醫護人員嘅專業水平獲得世界推崇，投身護理專業工作超過三十年嘅資深護士馮玉娟噚日收到通知，獲得第四十屆「南丁格爾獎」，係第一個香港護士得到呢個獎，預計今年七月會喺北京獲國家主席兼中國紅十字會名譽會長胡錦濤親自頒獎，認真巴閉。
呢個獎係護理服務界嘅最高榮譽，一九一二年由紅十字會為紀念過身嘅南丁格爾而設立，頒授畀全球優秀嘅護理工作者，表揚佢哋嘅獻身精神。呢個獎每兩年先頒授一次，每次最多只有五十人得獎。身為醫院管理局九龍西聯網護理總經理嘅馮玉娟係因為佢長期貢獻，作為業界模範而攞獎。不過佢就好謙咁話，做護士咁多年，最開心係見到病人好番出院，今次攞獎係全港五萬幾位護士一齊努力發揮專業水準嘅功勞。
傳真︰2623-9278
電郵︰[email protected]