莫文蔚在台灣及內地的樂壇均闖出一番成績，多次勇奪女歌手及歌曲獎項，在海外開演唱會反應亦甚佳，不過始終未能在本地樂壇頒獎禮脫穎而出，對此她揚言不會介懷，更直指本地頒獎禮只是一場交易，故她才一直拒簽歌星約。
莫文蔚（Karen）近年在內地和台灣奪得不少歌曲及女歌手獎項，奈何在本地樂壇頒獎禮上，Karen總未能取得佳績。日前Karen在銅鑼灣接受訪問，她對此不但毫不介懷，更直指本地頒獎禮只是一場交易，既然沒法子改變，倒不如轉玩其他好了。
Karen說：「我由細到大都只係諗住跳出香港，去更遠嘅地方同人比武，咁樣至會進步，香港係一個跳板，從來冇諗呢個係目的地。香港都有支持我嘅人，都想同佢哋分享，唔係要上乜嘢節目、出席乜嘢頒獎禮，又或爭取啲乜嘢播放率，都係多嚿鐵放喺屋企，我清楚自己要啲乜，老套啲講，我嘅抱負係為港增光，都已經做到啦。」
對於歌唱事業未能獲得本地樂壇頒獎禮認同，Karen只笑說：「大家清楚要交換，係一個交易，我好早明白呢啲遊戲規則，唔係我想要嘅嘢，但冇辦法，唔係我所能改變，都有班人玩嘅，我轉玩第二樣嘢囉。」問Karen是否有意退出本地樂壇領獎行列？她說：「冇附帶條件，人哋認為你做得好而畀個獎你，唔會唔攞㗎。」
不過Karen卻有感而發地說：「香港某電視台要本地歌手簽歌星約至會播歌，我去過其他地方做宣傳，冇一個地區會係咁，我唔明白點解要簽合約，歌曲至有機會播，可能係因為要攞嚿錢出嚟拍MV啦。」
此外，莫文蔚日前為演唱會前往周大福試戴三千萬珠寶，並說：「我未試過面對咁多鑽石，真係閃到眼都花埋。」周大福特別為該批首飾買下巨額保險，並由專人送到演唱場會場。
採訪：朱倬誼
攝影：陳慧安
服裝：西武百貨
場地：PhillipWian（CausewayBay）
