是日恒指高低波幅得56點，非常窄，成交得110億元，少過前市29億元。個市望落去，好似好和平，但可能係大戰前夕，買盤或賣盤側埋一邊，下集就係見真章。但亦驚住係十個牛皮九個淡，玩C輪都係小心為佳，注碼咪太狼。
中移動P輪3761：中移動（941）前日向下移0.45元後，昨日向上移5仙，熱門C輪3651升6%，收12.2仙。隻輪溢價OK，槓桿率唔錯。正股貼近去年3月高位後，遇阻力，唔易破位而上，中移動C輪博唔過。
想出擊，暫時揀P輪比較諗得過，對象係3761，7月初夠鐘，輪價8.3仙，溢價4.9%，槓桿率32.9倍（有效12.9倍），引伸波幅26.1%。呢隻輪上落快，做嘢要快手快腳。重有，記住如果正股牛皮，揸隻輪縮溢價就會輸錢，炒嘢只宜怡情小注。
馬鋼C輪3501：馬鋼C輪3501最近4日忽然有大成交，昨有71球易手，收15仙，散16%。9月初到期，溢價24.8%，槓桿率16.8倍（有效5.8倍），引伸波幅52.4%。馬鋼未除息0.22元人民幣，計埋股息因素，溢價更高。睇吓幾時隻輪由毫子輪變仙輪。𠵱家上車，唔係玩死亡遊戲就係傷亡遊戲。
章盛