常言道「五窮六絕七翻身」，港股噚日企穩，收報13968，升28點，但成交就進一步縮至110.6億元。滙控（005）美國業務表現雖令人擔心，但滙控有唔少窩輪快將到期，好淡雙方鬥得不亦樂乎，而唔少散戶亦在125元等接貨，滙控最終以126元收市，冇升跌。
益華（370）前日出現類似斬倉式下挫後，公司表示不悉跌因，噚日出現大反彈，升39.3%至0.202元收市，成交增至3351萬元。慶鈴（1122）則進一步下跌7.5%至1.51元。慶鈴往績PE高達40.3倍，與9.2倍的駿威（203）及6.9倍的長城汽車（2333）相比，肯定是偏高。
新濠（200）仍然停牌，有消息話會與PBL合資收購澳門一幅地皮建賭場，淨係地價都要成17億元。另外又傳擬配股集資15.6億元。若新濠開動抽水機，將令市場游資進一步縮減。嘉建（027）則持續大跌，噚日又挫8.19%至5.60元。先前以8元承配的投資人士，現在帳面已輸30%，真係見者傷心，聞者流淚。黑客話，嘉建咁跌法，應該與止蝕盤湧現有關。英皇娛樂酒店（296）亦挫16%至1.21元。
地鐵（066）近期頻頻向上突破，噚日高見13.50元，收報13.45元，升2.28%。若強勢持續，可向01年高位14.95元進發。
地鐵近期好消息唔少，凱旋門以靚價開售兼可提早入帳，此外，又銳意發展歐洲及中國地鐵項目，被標普調高評級。近期已有大行因應樓價上升而調高地鐵估值，一波認為地鐵每股資產淨值有可能升至18-19元。
今日是恒指成份股檢討結果揭盅日，雖然網通（906）傳聞是大熱門，但阿虎就覺得恒指成份股經常變動非好事，何況網通上市未夠1年，所以一動不如一靜，唔變好過。
阿虎