陳冠希（Edison）與三位緋聞女友周麗淇、2R的Rosanne和鄧麗欣（Stephy）一同出席活動，記者撮合四人合照，怎料Stephy被工作人員拉走，合照告吹。周麗淇表示與Edison不過電，Edison笑言這是對方的損失，因他是個好男仔。
陳冠希昨日與曾傳緋聞的周麗淇、Rosanne和鄧麗欣一起在尖沙嘴宣傳遊戲機，其他出席歌手尚有何韻詩、盧巧音和官恩娜等。當記者笑Edison與三位緋聞女友同場時，他笑容滿面地說：「係咩？你哋覺得有幾熱鬧呀？總之我唔想拍拖，亦唔會再為緋聞唔開心，因我覺得開心咁去做嘢會好啲，知道自己有工開，做乜重唔開心。」
現場所見，Edison不避嫌地與周麗淇談天說地，反而沒與Stephy和Rosanne交談。周麗淇對此強調二人只是好友，她說：「佢太靚仔啦，又有才華又有錢，同呢類型男仔拍拖冇乜安全感。」Edison及後得悉此話時，笑說：「佢唔揀我，係佢嘅損失啦，我係一個好男仔嚟㗎。」
而Rosanne則透露會向Edison索取電影《頭文字D》的首映戲票，她說：「《頭文字D》首映嗰日係我生日，所以我會問Edison攞飛，其實我同佢都好忙，冇話打電話問候對方，亦都冇再約出街。」Edison則表示會送戲票給Rosanne，但卻不知對方何時生日，他說：「我連自己套戲邊日首映都唔知，如果Rosanne到時搞生日party又請我嘅話，我都會去。」
活動完畢後，記者原本拉攏四人合照，當時他們均稱沒問題，豈料當三位緋聞女主角等候Edison拍照時，Stephy的助手和一名工作人員突然拉走Stephy，記者即上前問Stephy是否介意合照，她否認並指沒問題，但最後仍被拉走。當Edison得知合照告吹時，他即時向記者沙冧道歉，Edison無奈地說：「唔關我事㗎。」
採訪：李珮洳 攝影：葉君海
