前日小初先至講到，一樣係sell澳門概念嘅友力投資（674）不受其他濠賭股影響，股價照升如儀，隻股噚日就即刻停牌搞批股，又係開口中。不過，小初周圍問人都搵唔到配股詳情，淨係傳集資去濠江買酒店。
與此同時，小賭王的新濠國際（200）同樣話搞配股，但至寫稿呢一刻好似重未搞得掂，有人話係技術原因，亦有人話因為市場氣氛唔好之故，姑勿論如何，睇嚟新濠幕後人要加多兩錢肉緊先至會掂。
家陣大市飄忽而成交又細，但仍有股仔在高位企硬，例如渝太地產（075）就係一例。隻股坐擁唔少寫字樓物業，早排話想參與豪宅發展。另外，港通（032），因為東隧加價刺激股價上升，作為大股東嘅渝太自然水漲船高。
經紀黃話，渝太股價硬淨其中一個原動力，係有間歐資行密密在市場收貨，家陣已經揸住唔少。
渝太昨日升約1％，收1.10元。
慕容小初