母親節之日，酒樓人山人海，到會所飲茶，要分十一點半、一點、兩點後三場，晚上吃飯已一早爆滿，好彩左丁山素來不為天下先，飲茶飲下午兩點後，食飯食晚上八時半後，於是與人無爭。話雖如此，當然仍然會碰到好多人，其中一位就係資深教師MissI。
教師Ｉ飲茶飲得好輕鬆，有人問佢：「下午教協辦爭取小班教學遊行示威，你兩點幾先至開始飲茶，睇嚟唔似去示威噃。」教師Ｉ呷啖茶，慢慢先至講：「唉，重有乜好示威吖，我教中學嘅，幾年後就會輪到我哋冇學生，一半中學可以關門，就算係實行小班制，小到二十五人一班，我都懷疑十年後每年級有幾多學生。嗱，有數得計，現在全港中學生大約每級八萬幾人，但現時每年出生嬰兒少過五萬名，實際係四萬幾，你話十年後有幾多人讀中學吖。上街示威叫香港婦女早結婚，多生育，等學校能夠多收學生，咁就會保住我哋嘅飯碗嘞。」
唉，教師Ｉ都係新一代人物，結婚而無子女嘅噃，就算張文光帶人上街要求女人生育，以保教師飯碗，教師Ｉ都唔會響應。冇法啦，經歷負資產、超額教師、減薪凍薪之後，任曾署理點樣講，教師Ｉ都唔會考慮生育嘅嘞，何況拖得兩拖，已經過咗最適當嘅生育年齡㖭。
問教師Ｉ如何面對教師超額嘅前景，佢話：「我已做兩手準備，跟親戚做產品設計審核，即係從外國嘅新產品設計之中，選擇一啲適合我哋製造，行銷美國嘅。好彩我讀書時識得國際化，略識法文、意大利文，有藝術底，都幾易上手。與其上街示威，打一場輸梗嘅仗，我不如早謀出路，一旦冇書，都可