水貨大亨袁仁祥來電，語氣非常輕佻：「銅鑼灣有間樓上舖，乜唔係自稱代理咗原宿嗰隻『拉把酷』咩？點解唔見佢有新貨返？就算每次返親貨都只得幾件咁大把，我重以為佢有幾咁巴閉！唔係話我叻，就算𠵱家冇人着『拉把酷』，但我仍Keep住每款每次返一打起碼，一個禮拜之內重實賣晒㖭！乜人做代理佢做代理，返貨咁保守？做生意要搏，淨係掛住追女，唔掂噃！爆多單料你聽，上兩個禮拜南青山UnderCover，突然執行新例，T恤每人只限買一件。唔同以前，每人購買數量不限，以前經常每個款十幾件喺門口掃番嚟，店員從冇阻止，重笑晒口講『釘橋』㖭。點知最近原來有新加坡客向佢哋投訴，話香港水貨客掃貨太離譜，搞到一般客人買唔到嘢，咁南青山UnderCover咪迫住做嘢囉！不過唔使一個禮拜，佢哋又取消咗呢個規矩，恢復原狀。因為新例實施後，佢哋生意即跌。老實講，𠵱家UC全靠我哋香港水貨商撐住，唔係佢哋都幾頭痕。」說罷，袁仁祥話趕住同祥嫂上機，因為日本呢排黃金周有好多勁嘢出，到時相信佢又有好多八卦料提供喇。
主持人：大食Jack
八卦熱報：[email protected]