新蒲崗冧棚架，爆發塞車大災難！十萬市民慘遭癱瘓，運輸「問責局長」冬冬，終於喊咁口道歉！
冧棚架塞車嘅嗰日，塞車時間長達六七個鐘，好彩當晚唔係播緊《大長今》大結局，否則會隨時大暴動，到時冬冬一句對唔住就甩身？好難咯！
冬冬話：會成立一個「專責小組」嚟檢討！好心喇冬冬！八年來，香港人一聽見「專責小組」呢四個字，就想笑！廢董在位期間，成立過幾多個「專責小組」？由振興經濟委員會，至到所謂嘅扶貧，鑊鑊都「專責」，搞吓搞吓，連廢董自己都垮埋台！
專責？八方昨日嚴正指出：睇吓尖沙嘴巴士總站搬遷，拓建一個所謂「羅馬廣場」，咁少嘅事，旅遊、運輸、建築，都各有各搞，各有各玩泥沙！
阿董廢咗個政務司司長，何來「專責小組」？冬冬只係一個環境運輸及工務局局長，佢何德何能，學人吹雞？人人都睇死佢至多做兩年，想搞「專責小組」，要問過煲呔曾，不過現時曾爵士都重未宣布參選特首，邊個有權責又再「專責」？
冬冬冇法子解畫，惟有負氣發爛渣，話唔通樣樣「自己落手落腳做」咩？吓？乜冬冬咁樣講說話呀？以前殖民地政府，布政司霍德從來毋須親自落手落腳，點解殖民地時期行政管理又咁好？
有啲嘢，毋須自己落手落腳，不過就分分鐘要自己落足眼力睇到實！冬冬有冇請過菲傭？洗衫、煮飯、抹窗，唔通要個僱主Madam自己親手做？唔使親手做，咁唔通就可以縱容個菲傭做大懶蟲？
冬冬發晦氣，反而令人質疑，如果佢屋企有請菲傭，個菲傭一定好悠閒，好幸福，可以一日到黑攤喺冬冬屋企嘅梳化歎冷氣，然後白出糧咯！
傳真︰2623-9278
電郵︰[email protected]