好多人都會怕痛而唔敢去捐血，其實輕輕拮一針就可以幫到人，何樂而不為？噚日係立法會一年一度嘅捐血日，有十個議員就瞓晒身支持，好似肥仔明、涂謹申、陳偉業、大班、蔡菜子、黃定光同曾鈺成等等，人數同往年一樣。
有紅十字會嘅職員同八方講，立法會捐嘅血一直唔多，因為立法會唔多人，呢個站嘅「貢獻」一定唔及其他公營部門同私人機構，不過就好有宣傳效果，所以每年都要嚟立法會搞捐血活動。
蔡菜子捐血嗰陣話，佢同煲呔噚日冇傾選特首，不過就傾生仔問題，煲呔猛咁叫人生仔，佢重話：「生育係女人嘅天職，唔通叫男人生咩？」煲呔又同蔡菜子講，佢老婆為咗生仔都辭咗職冇做工。蔡菜子就窒番煲呔話：「你賺錢多，你老婆先至可以生仔唔做嘢啫！」
傳真︰2623-9278
電郵︰[email protected]