黎明呢排雖然忙緊宣傳唱片同電影，但噚日凌晨仍偷得浮生率領全男班去中環Dragoni蒲吧，重飲到啤啤夫，面紅耳赤兼腳步浮浮，連鞋帶都甩埋，成班朋友驚佢仆親，即刻左右扶住佢落樓梯。有記者問黎明係咪開P，佢亦只係不停儍笑。
黎明凌晨至去蒲吧尋開心，但下晝咁啱有周刊話黎明欽點港姐冠軍徐子珊拍電訊網絡廣告，早排佢哋去日本拍廣告外景時，黎明重對徐子珊特別照顧，因而傳出緋聞。咁啱徐子珊亦向拍拖兩年、喺劇團「劇場空間」擔任製作經理嘅男友溫迪倫提出分手，溫迪倫上星期重喺佢嘅私人網頁度以「it'sover」（玩完）嚟形容自己嘅心情。
不過噚日溫迪倫已經停用佢個網頁，佢喺網上留言：「日記要停了，希望可以有其他地方連載，因為這是個公開園地，讀者未必都是好朋友，被人出賣了，這種感覺並不好受。」至於黎明唱片公司嘅負責人王凱文話，黎明同徐子珊一齊喺外地做嘢，照顧女仔都好正常，但講到黎明係咪𠝹掂徐子珊，佢就話「nocomment」。
陳鍵鋒噚日到銅鑼灣出席禁毒活動，佢話自己一向唔食煙，毒品就更加唔掂。佢又話最近接觸有關毒品嘅消息，就係佢拍《學警雄心》期間發生嘅兩單新聞，雖然佢冇講明係邊個，但馮仁昭就知佢其實講緊吳浩康同周永恆。
梁詠琪（GiGi）噚日喺台灣錄影電視節目《康熙來了》，一向鍾意狗嘅GiGi猛咁同現場一隻大狗玩，點知俾隻狗胸襲。GiGi講到同伊健第一次單獨約會嘅情形，佢話：「其實當時只是談公事，所以直接穿拖鞋，戴着眼鏡就赴約。第一次接吻是拍戲時，只是輕輕一啄而已。」
楊洛婷自從當選港姐亞軍之後，就開始出任康泰旅遊大使到𠵱家，噚日楊洛婷同符思思喺尖沙嘴出席宣傳活動，楊洛婷話旅遊大使呢個位即將約滿，佢話：「做咗旅遊大使年半，今個月約滿，我都好希望可以再做。」
內地演唱會之父陳達志（Ba叔）疑被騙近二百萬一案，噚日佢喺區域法院作供完畢。Ba叔話今日下晝會同歌神許冠傑去廣州，為呢個禮拜日舉行嘅演唱會作準備。Ba叔噚日離開法庭時，咁啱遇上喺法院門外拍無綫新劇《識法代言人》嘅黎耀祥，Ba叔重好熱情咁同黎耀祥合照。
案件編號：DCCC1235/04
梁家輝同張穎康噚日喺尖沙嘴宣傳電影《追蹤眼前人》，戲入面家輝飾演港聞版狗仔隊，佢話體驗到做狗仔隊原來好辛苦，捱更抵夜，又冇收工時間。另外，網上有傳家輝好友張曼玉結婚，家輝話冇聽過老友話要結婚，重話網上新聞信唔過。
