新一輩年輕人實在主意多多，買樓勢要將屋企變成家居雜誌裏面的懷舊屋，但講明唔追求花樣年華式的六十年代花喱碌，而係更有主題的七十年代風格，當中可能就係多張DesignerChair（雖然只係仿做嘅）！而為咗布置到間屋好好睇睇，屋主William同Olivia更花成兩、三個月時間到處搜羅家品擺設，咁成間細細哋600呎嘅屋就變成甚為有味的復古部屋啦！
記者：梁彩燕
攝影：黃子偉
設計公司：SpaceDesign（27132973）
（www.spacedesignhk.com）
William同Olivia剛搬入新居不足一個月，對新屋的風格要求方向清晰，坦言唔想嘥咗新樓嘅設計，所以決定唔搞裝修，重話喺投資角度而言更加保值咁話！除咗搵設計公司幫手構思一間滿有70年代Feel的「私竇」外，自己亦同步花咗兩、三個月時間到處搜羅家品及擺設。
William話：「平時揭家居雜誌，已經好嚮往人哋可以有間咁特色嘅懷舊屋企㗎啦，今次就趁自己搬新屋，真正擁有一間！」為間屋可謂花卻不少心思心血，William重有少少心得同大家分享：「買咗樓後裝唔裝修一回事，想懷舊想Cyber想Elegant都好，最先應該諗自己好想要的主題，再專攻相關的擺設。」無錯！有咗清晰方向同目標，做事就會事半功倍。
嚴選70年代
要懷舊，都有好多種，人人淨係講Retro，原來唔同年代已經好有分別，William嚴選70年代，且聽箇中原因：「60年代比較似『花樣年華』，感覺古老點；而70年代則開始進入太空年代，多啲顏色元素，較鮮豔。」都講得好專業喎！「都係設計師Tracie講我先識！」負責設計的Tracie亦順帶補充：「60年代的確多花花嘢（即視覺上花喱碌，唔係一朵朵花那種！），整體效果都係花，而70年代其實每件Product都有其賣點而且有Point，主題性較強，兩者所要求的品味和效果不同，所以William間屋都擺張DesignerChair加強個主題性，而且風格屬於ModernRetro，將七、八十年代的元素同二十一世紀的元素進行Crossover。」就係咁，取得懷舊箇中的精髓才為重點，不然一味要舊一味花，只會變得一屋的老土調子。
色彩作區域分野
全屋雖然多復古嘢，但唔同區域以唔同的顏色做主調，可有分野的作用，同時亦唔會一屋都相同顏色咁悶，William娓娓道出：「客廳以橙色、啡色同少少黃色為主，我哋亦專登買咗好多橙色的小擺設襯返間屋；睡房就用綠色，綠色畀人感覺自然啲，望落都舒服啲嘛！而另一間房暫時無特別用途，閒時就會響裏面打機，衣櫃用紅色的亞加力膠，其實橙色都靚，不過想多顏色變化，唔會咁寡嘛！」
買德國DeadStock窗簾
全屋三幅窗簾，其中有兩幅布料係真係七十年代嘅德國產品，度啱Size再搵人車，所以一幅閒閒哋埋單都要千幾蚊。
五千蚊七盞燈
買燈其實係一門學問，咪以為求其整幾盞座枱座地燈就掂，買到貴一貴亦唔代表啱你（間屋）用，今勻都係屋主親自揀燈買燈，過程都可算歷盡艱辛，走遍港九新界又真係誇張咗啲，但中環士丹頓街、跑馬地家具店、尖沙嘴利時、旺角潮流特區等等就實冇講漏，睇得多又會令人三心兩意，最終決定唔到，當然亦由設計師出馬畀意見！成果當然令人滿意，只花了五千蚊就買齊全屋燈，而7盞燈之中，大部份以吊燈為主，最令William同Olivia滿意的就係飯廳的吊燈，只需千零蚊，形狀好似兩粒藥丸咁，玻璃燈罩有點似水晶體，反射出來的光線就會好靚，白牆就唔會單調喇。
睡房多暗格
一來搬入新屋冇幾耐，雜物唔算多，二來家具除了注重款式外亦夠晒實用，𠵱家咁興隱藏暗格，睡房就最多嘢睇，地台可儲物又可當梳妝椅用，床架可以抬起大到可以放行李篋，就連窗台都話有得揭蓋放嘢，真係佩服！
DIY盞鬼搞作
家陣年輕人特別多花款搞，而且鍾意落手落腳DIY，屋主William亦諗頭多多，買燈買窗簾重唔夠，呢趟實行搞自家創＋製作，幾十蚊買貼紙黐滿個雪櫃，行為夠晒酷，大門口雜誌架上放滿潮流讀物，望真啲，兩位主人做封面男郎女郎喎！過多幾秒二人搶住揭盅：「我哋自己響電腦整㗎！」唉，原來雜誌只是虛有其表，又被騙了……不可思議一輪，視線再移上少少，黑板仔寫住「潮爆新×屋」，呢兩口子都幾盞鬼喎，大家覺得呢？
