大市裂口低開，恒指由跌123點變為跌78點埋單，唔算太壞。有過夜貨（指C輪）在手者，喺跌市中當然難捱，但股價如果唔跌，好友點有機會買平貨？如果個市直線上升，高價搶C輪者分分鐘撞板。低價入市，風險細好多。
中電信C輪4500：昨日講嗰隻中電信C輪4500，前日正股（728）跌7.5仙而隻輪只跌1.3仙，跌唔夠。正股昨日再跌2.5仙，4500跌夠3.6仙，跌幅21%，補跌晒，可以趁低博反彈。4500喺10月尾夠鐘，溢價10%，槓桿率19.8倍（有效8.9倍），引伸波幅24.1%。
中電信有隻冷門C輪3889，好少成交，輪價17.2仙，壽命比4500長3日，但溢價12.2%，槓桿率15.4倍（有效7.1倍），引伸波幅30.2%。4500拍埋3889，條件贏晒。
中企C輪3725：國指跌幅大過恒指，中企指數C輪自然散落去。熱門貨3725一開已經唔見12%，由12.3仙散落10.8仙，最低去到10.2仙，埋單價10.5仙，全日跌幅15%。國指跌幅由67點到埋單只跌39點，3725似乎跌突咗啲，博反彈可也。隻輪6月尾到期，溢價1.1%，槓桿率17.3倍（有效12.6倍），引伸波幅21.9%。數據、買賣活躍度，其他中企指數C輪冇隻夠佢嚟。
章盛