數碼影音：<br>810萬像素+2.5吋大芒AKIRA口袋DC單挑SONY

數碼相機市場，好似一直都係幾間老牌相機廠玩晒！新入門廠商，好多時都只係玩吓「類似WebCam」嘅餘下空檔；日本老牌影音生產商AKIRA，有心打破呢個宿命，最近新出了一部X-ProSTi，810萬像素CCD感光元件、全金屬機身亦覺實淨墜手！影相能力唔錯，再加2.5"大芒、潮玩纖巧機身，比SONY同樣玩口袋DC嘅P系列有更高像素！

記者：朱崇德
攝影：陳盛臣
ImageGirl：Ana

講到AKIRA呢個品牌，好多人都會馬上聯想到DVDPlayer、流動式DVD機或喇叭影院組合一類產品，日本老牌子，質量唔錯又抵玩！今次新落場玩高技術嘅數碼相機，大家咪一心當佢係新手！代理方面直認X-ProSTi其實是搵人代工的OEM機；機源是來自Termier，未聽過？代理稱她先後曾為KonicaMinolta、BenQ、Rollei等大廠製造OEM機，來頭實在不小！

■輔助對應燈使用綠光設計，就算打落被攝者面部都唔覺刺眼。

■影相、睇相轉換鍵，都係好鬼CASIO嘅配置。

一機在手，第一個觀感係機面設計幾Classic，不過質感就係HeavyMetal，鋼水感覺好實淨，唔似一般Cam仔畀人一種輕飄飄感，拎上手感覺唔錯；擰轉機背，2.5茪j芒同按鈕設計，都好有大機風範，甚至有AV場Sales誤認佢係CASIO出品，留心睇，又真係幾似喎衰鬼！
首個搶眼點是使用上810萬像素CCD，以同級輕便機比較，一般重行緊最高700萬像素，佢都算係行先人一步，成像格式分為3,264×2,448、2,560×1,920、1,600×1,200及640×480四種，再加高、中、低壓縮比的調校，對應不同場合同記憶體的運用，都好富彈性；此外，在最高解像下還特別加入了TIFF「無壓縮」嘅拍攝功能，以輕巧機嚟講，都算幾強玩！

■機背設計好明顯走CASIO早年款式，屏幕就配上今年漸成標準嘅2.5"Size。

■2.5"芒夠大夠光猛，解析度再高啲就更正。

■最高成像達3,264×2,448，細機中少見。

DC另一靈魂所在，當然係佢支鏡頭啦！3倍光學變焦，相當一般35mm菲林機的36-108mm（F2.8-4.8），只算是中規中矩，可幸是分析能力都算理想，新牌子出嘅鏡嚟講，未算驚喜，但總算實際！
拍攝模式都幾全面，一般全自動、光圈先決、快門先決及全手動都落齊，再加埋「內置」及「全手動」調校白平衡壓陣，細機嚟講都玩得幾Pro吓；不過小記做測試時感覺最驚喜的，係竟然內置有輔助對焦燈功能，簡單講係佢會在陰暗環境下，射出光束至被攝主體上，令對焦系統更準確！心裏面嗰句，少部份老牌子「輕巧型DC」，都係到最近先加入呢項重要功能，以一個DC新牌子嚟講，感覺真係幾體貼。此外，機身重內置有Movie拍攝模式，基本都係行640×480（30fps）嘅AVI格式，質素亦達DVD級，都係嗰句，你張卡有幾大，一定俾你影到爆為止，絕無欺場。

■3倍光學變焦，屬人有我有設計，叫做夠用啦！

■內置白平衡感覺做得幾好，色溫好準吓。

■最流行嘅模式轉盤，硬照、動畫轉換方便。

■電源使用專用鋰電池，一般使用2?小時應該冇問題。

■機背按鍵設計好大路，唔睇說明書都好易上手。

室內環境：EV+1級走閃燈
室內環境最能測試DC的測光能力，同一般DC一樣，落閃燈會感覺稍硬，最好飛走閃燈，再用內置EV+/-功能調高一級，相片成像先至較順眼。

外拍環境：陰天亦拍得好
測試時間，是剛落黃色暴雨警告之後的陰天，使用了「陰天白平衡」，估唔到綠、紅、藍三色都出得幾好，雖然「味精」感稍重，但對一般口袋機用家，實在好適用。

PROFILE
感光元件：810萬像素CCD
顯示屏：2.5"LCD
鏡頭：3×光學、5.1×數碼
記憶卡：SD
體積：91×57×27
重量：150g

AKIRA　電話：27655868

數碼影音：810萬像素+2.5吋大芒AKIRA口袋DC單挑SONY

數碼影音：
810萬像素+2.5吋大芒AKIRA口袋DC單挑SONY