內地最近不斷出招，為樓市降溫，似有干預市場運作之嫌，但蘭西覺得，有啲措施確為消費者設想，保障買樓權益與知情權。措施專門打擊鍾意弄虛作假、大話連篇嘅發展商，因為有預售證兼賣緊嘅樓盤，由基本資料到銷情，都要喺國土局網上公布。邊個盤、邊一座甚至邊一層賣咗幾多，都一清二楚，單位是否有認購、已簽買賣合約、又或取消咗合約等，盡量做到公開透明，畀普羅大眾更多知情權，咁就唔會因發展商亂噏，炒家亂炒，而做出錯誤決定。
金融風暴後呢幾年，香港特區為咗打救班發展商，將好多保障買家知情權嘅措施取消晒，例如𠵱家好少見有價單派；明明公開發售，又要遮遮掩掩話係員工內購；有啲發展商搵埋炒家做Show，谷高樓價；有啲賣樓時神神秘秘，但就猛話賣得好好，令人半信半疑。一直自詡地產市場好成熟、資訊好開放嘅香港，係咪要向內地借鏡呢？
薄扶林豪宅貝沙灣，吸引唔少知名人士之外，地產代理高層都幫襯，好似中記董事唐秉正與美記執董陳坤興，都係業主。第二期上個月收樓，唐秉正買入嘅三座三十三樓A，千七呎，已率先以每月五萬二租出，呎租近三十一蚊，寧舍高過人。
貝沙灣一期舊年九月收樓，租金每呎二十五，第二期啱啱收樓，呎租三十蚊，升咗兩成。第三期下年收樓，中記估計，租金可以升至山頂樓水平，成四十蚊一呎。
今個佛誕假期，中記與盈大搞開放日，盈大出售貝沙灣示範單位嘅家具，低至二折。買家或租客都獲送二萬分會所積分。
香港人買樓熱情高漲，對象唔只係本地樓，重包括海外物業。英國、加拿大與澳洲，係最熱門地點，東南亞就首推新加坡。
新加坡吉寶置業國際發展嘅CaribbeanatKeppelBay住宅項目，今個禮拜六會喺本港展銷，戴德梁行（新加坡）任聯席銷售代理。
發展商重推出延期付款計劃，首期兩成，餘款兩年後畀，同時又送買家KeppelBay遊艇俱樂部十年會籍，並且豁免五年會費。樓盤已推出六百五十個單位，至今賣出逾七成。
呢個樓盤係新加坡唯一已落成嘅海濱住宅，對岸就係會起賭場嘅聖淘沙綜合度假村項目。
「睇完東涌水藍天，請花十零分鐘車程，到迷人嘅愉景灣參觀、比較。佢毗鄰迪士尼樂園，有大嶼山桃花源美譽。愉景灣別墅，以朝暉路最靚，鳥語花香……其中一座被稱為董事屋，係萬綠叢中一點紅，最為吸引人……」
睇完呢段咁有文采嘅介紹，千祈咪誤會係大嶼山愉景灣發展商香港興業嘅樓盤廣告，查實係愉景灣一個業主嘅自讓廣告嚟咋。
個業主重話，間屋放盤叫三千七百萬，每呎一萬一千幾，抵過高座分層豪宅，而且業主自讓，重免佣㖭。呢段廣告夠晒特別。
零售業受惠於自由行，好多做呢類客生意嘅零售商，賺到盆滿缽滿，有啲因為咁起死回生㖭。不過，隨住租期屆滿，形勢就唔同嘞，因為大業主大幅加租，咁零售商賺到嘅，大部份就進貢大業主。
蘭西聽聞，有啲商場大業主傾續約時，索性搵埋租客嘅對手，一齊出價投標，價高者得，實行賺到盡。假如係上市嘅零售商，用開嘅舖一旦續約，盈利可能大幅急跌。
商場大業主以投標方式出租舖位，其實都有先例，但只限代理行業，𠵱家估唔到其他行業都咁做，唔知係咪等於殺雞取卵呢？
電郵地址：[email protected]
