港股持續調整，恒指跌穿萬四點大關，最低13895，收13939，跌78點，成交139億元；期指13870，低水69點。噚日大市明顯轉弱，下跌股（不計認股證）超過450隻，遠比上升的142隻為多。
大市今次上升，在14000至14200水平遇阻，好正常，照計就回落到13800應該有支持，不過，睇番啲窩輪呢兩三日嘅表現，似乎大戶仍想在13300至14200個長方形內食多幾轉先收手。
今個禮拜，C輪嘅跌幅都大過正常水平，即係跌多咗，約莫低成5%至10%，根據過往經驗，大戶肯平啲沽，後市好大可能會再推低，之後佢哋平價又可以買番，所以，13800若果守唔住，大戶真係會篤番落13300至13500呢啲位。
大行看好聯洲國際（048），聯洲呢輪嘅表現亦對辦，噚日大市氣氛咁差，聯洲早段跌一跌，跟住就掃上去，最高見2.0元，收1.97元，升5仙。本欄4月中曾推介，中線目標價3.20元，看法不變。
聯洲宣布同瑞士信貸達成協議，贖回3批在03同04年發出，為數2500萬美元中尚未行使的可換股票據，目的好明顯，就係公司唔想股東嘅權益進一步被攤薄。其實，同國際同業比較，聯洲現時嘅股價實在好偏低，特別係收購歐洲Salamander之後，大行同基金已對聯洲另眼相看。
早前嘅收購，對聯洲同Salamander係兩贏之局，聯洲可進一步提升皮革業務嘅優勢同增長，有助擴充亞洲同歐洲市場；而Salamander合併後，整體邊際利潤提升，亦可快速完成定單。
聯洲管理層對公司前景信心十足，今次贖回瑞士信貸的可換股債券，消除了股債換股所引發嘅沽壓，消息利好，噚日股價先跌後升，主要係有大盤掃貨，成交急升到接近4000萬股，係自04年3月3日以來嘅最高紀錄。大戶現水平重大手掃入，後市看升50%，並不為過。
去年3月8日，聯洲高價1.98元，9月9日曾低見1.18元，1年多以來，聯洲走勢成個大圓底嘅收集區，噚日有大成交配合，預期可升破圓底頂部阻力，確認大升浪開展，以量度升幅計，中線目標指向3.20元。
郭兆誠