本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由政府熱線「1823」職員接聽。
阿夢：阿明，我哋不如下個星期一去澳門玩囉，閒日去無咁多人嘛。
阿明：咦，你唔係返緊份暑期工嘅咩，你放假呀？
阿夢：梗係唔係啦，邊有咁多假放，我都儲夠書簿費咯，所以咪諗住唔做囉。我諗住星期六話畀公司聽我唔做，咁星期一咪可以去威囉。
阿明：吓，乜你唔使畀通知期就走得㗎喇？
阿夢：通知期？我星期六通知咪就係囉！我做暑期工啫，唔使乜嘢通知期係嘛？
阿明：你有簽合約㗎，快啲攞出嚟睇吓啦！
阿夢：咦！係喎，合約寫明過咗第一個月試用期之後，任何一方要終止合約都要七日前通知或者畀七日代通知金喎。
阿明：即係同《僱傭條例》裏面有關通知期嘅最低規定一樣囉。
阿夢：我係暑期工咋噃！間公司有無呃我？
阿明：只要你同僱主建立咗僱傭關係，無論你係叫做長工、散工、或者暑期工，只要你嘅僱傭合約條款唔差得過《僱傭條例》，咁就要按合約辦事喇。你諗吓，如果你無犯錯而公司想唔用你，佢都要七日前通知你啦，好公道啫。
阿夢：咁又係，咁等我今日通知公司辭職，再做多七日先走啦。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]