澳門賭業股呢排真係冇運行，除黃金集團（1031）同世紀建業（079）股價繼續滑落，各自下跌10％外，連帶嘉華建材（027）股價都急跌10.29％，收6.10元。
經紀黃話，嘉建跌得咁重，當然係芬佬沽貨先至有咁嘅場面，反映市場對濠賭股睇法已經逆轉。新濠國際（200）噚日停牌，有待公布傳聞已久的抽水發展大計。聽聞呢個項目涉及金額龐大，新濠好似會搞埋批股，胃口相當大，起碼十億八億樓上，但現時氣氛咁差，真係唔知佢點搞？
但小初心諗，以賭王的大名，冇話搞唔掂嘅。
雖然濠賭股唔得，但奇就奇在一樣係sell澳門概念的友力投資（674），就完全不受影響，股價照升如儀，噚日再升6.15％，收0.69元，成交股數3591萬股，金額2431萬元。
江湖一直傳聞友力在濠江將有大動作，但單睇人跌我升的情況，好明顯已經變成私人派對。
慕容小初