日本尊尼偶像組合NEWS及關Johnny8嘅成員內博貴，前日透過網頁表示，因為肺穿窿而要緊急入院接受手術，所以要辭演有份演出嘅舞台劇同節目，而日前宣布由內博貴夥拍電影《頭文字D》女主角鈴木杏演出嘅富士電視台七月新劇《擊浪青春》，就會押後開拍。
今年十八歲嘅內博貴身兼兩職，分別係組合NEWS同關Johnny8嘅成員，經常要穿梭東京同大阪兩地為兩隊組合演出。早前啱啱至為NEWS推出嘅首張大碟忙完一輪宣傳嘅內博貴，上星期日晚喺大阪梅田為舞台劇《Hey！Say！DREAMBOY》演出時，喺台上突然覺得心口一陣劇痛，不過當時佢仍然死頂繼續表演，直到第二日到醫院檢查時發現肺穿窿，要即時接受手術，預計需要三星期至可以康復。
除咗舞台劇要辭演外，原定內博貴有份演出嘅節目亦暫時由NEWS或者關Johnny8嘅成員頂替。而內博貴有份演出嘅富士電視台新劇《擊浪青春》就會押後開拍。內博貴喺網頁內向fans道歉，佢話要辭演雖然好可惜，但會靜心休養，希望早日康復再見fans。