許多年前，從蔡瀾先生的文字中認識中環一個地方叫「屎坑巷」，巷內高手雲集，「滷水鵝」、「豬雜湯」、「沙爹牛河」等名頭響噹噹，可惜因為遷拆問題，未有機會幫襯。
許多年後，再從蔡瀾先生的文字中得知一眾潮州高手已遷往皇后街熟食中心，慌死執輸，嗱嗱臨帶埋一家大細去食番夠本。
非常乾淨的室內大牌檔，顧客坐低後可以從四方八面的食檔中選擇心頭好，是我最喜歡的搵食環境。
先來陳勤記的滷水鵝，嘩，肉質之柔軟入味可以用震撼嚟形容，最怕食到啲練過「橫練鐵布衫」嘅滷水鵝，鵝肉堅如鐵甲，嚼之全口是渣，有如𡁻木頭一樣。陳勤記的滷水鵝肥瘦適中，毋須增磅亦毋須纖體，一家人風快幹掉大大隻一隻鵝，唔係話嚇你，陳勤記下午時分便賣晒貨，夜晚想食都冇得食。
亭記小廚的馳名沙爹牛肉炒河，沙爹醬濃郁惹味，食到一粒粒的碎花生，河粉索盡精華，食過唔想再食其他地方嘅沙爹牛河。
陳春記的豬雜湯享負盛名，豬雜內容豐富，尤其是豬肺、豬腸、豬紅，又軟又滑，最便宜的材料弄出龍肉的味道。一啖湯入口，肉香滿溢，不止開胃，直情開心。
皇后街的熟食中心尚有好幾檔食肆，出品同樣精采，真箇是卧虎藏龍，媲美光明頂或惡人谷，如要每檔每樣試清楚，真係要分幾次慢慢食。